Har beshinchi o‘zbekistonlik bankda omonatga ega
Shu bilan birga, fuqarolarning deyarli to‘rtdan bir qismi pullarini uyda saqlaydi.
O‘zbekistonda fuqarolarning atigi 20 foizi bank omonatlariga ega, yana 23 foizi pullarini uyda saqlaydi, deyiladi Markaziy bank so‘rovida.
Ma’lumotlarga ko‘ra, o‘zbekistonliklarning 34 foizi umuman pul jamg‘armasi yo‘qligini bildirgan. Shunday qilib, Toshkentda bunday fuqarolarning ulushi 38 foizni tashkil etdi, bu mamlakat bo‘yicha maksimal ko‘rsatkichdir. Keyingi o‘rinlarda Farg‘ona va Toshkent viloyatlari joylashgan bo‘lib, bu ko‘rsatkich 37 foizni tashkil etgan. Navoiyda bunday fuqarolarning 25 foizga yaqini bor.
Shu bilan birga, omonatlari bo‘lgan fuqarolarning eng ko‘pi Qoraqalpog‘istonda bo‘lgan — 31%. Keyingi o‘rinlarni Buxoro va Navoiy egalladi, bu ko‘rsatkich mos ravishda 26% va 24% oralig‘ida bo‘ldi. Andijon viloyatida 36 foiz fuqaro naqd pul saqlayotganini tan olgan bo‘lsa, Namangan va Jizzaxda bunday fuqarolar 27 foizni tashkil etgan.
Qayd etilishicha, 36 foiz holatda fuqarolar naqd pulda, 29 foiz holatda esa kartadan pul o‘tkazish yo‘li bilan omonat qo‘yishni afzal ko‘radi. So‘ralganlarning 35 foizi omonatlarni masofadan turib yaratish uchun ilovalardan foydalanishini aytdi. Andijonda respondentlarning 47 foizi va Xorazmda 43 foizi naqd pulda omonat ochishni ma’qul ko‘rgan. Holbuki, Toshkentda bundaylar atigi 29 foiz, Qoraqalpog‘istonda 26 foizni tashkil etgan.
Bundan tashqari, respondentlarning yarmidan ko‘pi ilovalardagi omonat funksiyalarini bilishini va ulardan foydalanishini ta’kidlagan. So‘ralganlarning 37 foizi bilishini, lekin foydalanmasligini bildirgan. Bunday funksiyalardan eng ko‘p foydalanuvchilar Qoraqalpog‘istonda bo‘lib chiqdi — 61% va Buxoroda 57%. Eng kam foydalanuvchilar Toshkent va Andijonda bo‘lgan — mos ravishda 43% va 37%.
Avvalroq o‘zbekistonliklarning deyarli yarmida jamg‘arma yo‘qligi xabar qilingandi. Jamg‘arilgan mablag‘lar miqdori yashash, ta’lim olish va ish joyiga qarab farq qiladi.
Izohlar