Toshkent viloyatidagi yangi aeroport qanday bo‘ladi?

Toshkentdagi mavjud aeroportdan 17 kilometr janubda yangi xalqaro majmua quriladi. Bu haqda transport vaziri Ilhom Mahkamov “O‘zbekiston 24” telekanaliga bergan intervyusida ma’lum qildi. Loyiha davlat-xususiy sheriklik shaklida amalga oshirilib, Samarqandga olib boruvchi avtomobil yo‘li va bo‘lajak pullik trassa yonida joylashadi.

Uzbekistan Airports rahbari Javlonbek Umarxo‘jayevning so‘zlariga ko‘ra, poytaxtning amaldagi aeroporti yiliga 11 million yo‘lovchiga xizmat ko‘rsatishga mo‘ljallangan, biroq hozirning o‘zidayoq tig‘iz soatlarda ortiqcha yuklanishga duch kelmoqda — tirbandliklar yuzaga kelmoqda, avtoturargohlar esa to‘lib ketgan. 2030-yilga borib yo‘lovchilar oqimi 15 million kishidan oshishi mumkin, mavjud infratuzilmani kengaytirishning esa imkoni yo‘q.

Cheklovlar havo hududi bilan ham bog‘liq: shahar markaziga yaqinlik parvozlar uchun manyovr imkoniyatlarini deyarli 50 foizga qisqartiradi.

“2030-yilga borib aeroport o‘z resurslarini to‘liq sarflaydi”, — dedi Umarxo‘jayev.

Yangi aeroport birinchi bosqichda yiliga 20 million yo‘lovchiga xizmat ko‘rsatish, bir vaqtning o‘zida 169 ta samolyotni qabul qilish va joylashtirish, shuningdek, soatiga kamida 40 ta uchish va qo‘nishni ta’minlash imkoniyatiga ega bo‘ladi. Teletraplar soni 14 ta bo‘ladi, kelajakda 45 tagacha yetadi.

Eslatib o‘tamiz, aeroport qurilishi haqida prezidentga taqdimot chog‘ida ma’lum bo‘ldi: Toshkentning amaldagi aeroporti zarur o‘tkazuvchanlik qobiliyatiga ega emasligi va shahar hududida joylashganligi sababli kengaytirilishi mumkin emasligi, shu munosabat bilan Toshkent viloyatida yangi aeroport qurilishi rejalashtirilayotgani ta’kidlandi. Hozirda rasmiylar xususiy sheriklik mexanizmi doirasida xorijiy kompaniyalarning takliflarini ko‘rib chiqmoqda.