Sog‘liqni saqlash vazirligi Toshkent shahrida DMED platformasida “Elektron retsept” eksperimental tizimi ishga tushirilishi munosabati bilan fuqarolar va tibbiyot xodimlarining murojaatlarini o‘rganish bo‘yicha yig‘ilish o‘tkazdi.
Ma’lumotlarga ko‘ra, muhokamalar davomida mutaxassislar bemorlar va poliklinikalar duch kelayotgan muammolarga alohida e’tibor qaratgan. Xususan, navbatlar va tibbiyot muassasalariga yuklamaning ortishi shunday muammolardan biri bo‘ldi. Bundan tashqari, vazirlik vakillari dori vositalarini olish va raqamli xizmatlar barqarorligi masalalarini muhokama qildilar.
Qayd etilishicha, aholidan kelib tushayotgan barcha taklif va mulohazalar ustuvor ravishda ko‘rib chiqiladi. Shundan so‘ng, to‘plangan ma’lumotlar asosida Sog‘liqni saqlash vazirligi jamoatchilik vakillarini tashvishga solayotgan asosiy masalalar bo‘yicha dastlabki tushuntirishlarni tayyorlaydi va e’lon qiladi.
Eslatib o‘tamiz, poytaxtda 2025-yil 10-dekabrdan boshlab “Elektron retsept” tizimini joriy etish bo‘yicha eksperiment boshlandi. 2026-yil oxirigacha hukumat mamlakatdagi barcha tibbiyot muassasalari va dorixonalarni tizimga ulashni rejalashtirmoqda, 2027-yil yanvaridan esa elektron retseptlarga to‘liq o‘tish majburiy bo‘ladi.
