Toshkent viloyatida yangi xalqaro aeroport qurilishi rejalashtirilmoqda
Poytaxt havo porti zarur quvvatlarga ega emas.
Shavkat Mirziyoyev transport sohasidagi yirik loyihalarning amalga oshirilishi haqidagi ma’lumotlarni o‘rganib chiqdi, deb xabar bermoqda prezident matbuot xizmati.
Ma’ruza davomida Toshkent shahrining mavjud aeroporti zarur o‘tkazuvchanlik qobiliyatiga ega emasligi va shahar hududida joylashganligi sababli kengaytirilishi mumkin emasligi, shu munosabat bilan Toshkent viloyatida yangi aeroport qurilishi rejalashtirilayotgani ta’kidlandi. Hozirda rasmiylar xususiy sheriklik mexanizmi doirasida xorijiy kompaniyalarning takliflarini ko‘rib chiqmoqda.
Shuningdek, mamlakatda avtotransport oqimlarini bo‘shatish uchun muqobil yo‘nalishlar loyihalari ishlab chiqilayotgani ta’kidlandi. Shu munosabat bilan davlatimiz rahbariga qulay investitsiya muhitini yaratishga qaratilgan yangi tahrirdagi “Avtomobil yo‘llari to‘g‘risida”gi qonun taqdim etildi.
Xususan, rasmiylar bir qator mamlakatlar kompaniyalari Toshkent va Samarqand o‘rtasidagi muqobil tezyurar avtomagistral loyihasini amalga oshirishga qiziqish bildirayotganini ma’lum qildi. Mutasaddilar muzokaralar natijalari va bildirilgan takliflar yuzasidan axborot berdi. Davlat rahbari strategik muhim infratuzilma obyektlarini puxta ishlab chiqish va loyihalarni qisqa muddatda amalga oshirishga o‘tish zarurligini ta’kidladi.
Izohlar