O‘zbekistonda zo‘ravonlikdan himoyani kuchaytirish muhokama qilindi
Toshkentdagi anjumanda yangi qonunlar va keng qamrovli qo‘llab-quvvatlash tizimi taqdim etildi, shuningdek, jazo choralari kuchaytirildi.
Toshkentda 12-sentyabr kuni Oliy sud tomonidan Ijtimoiy himoya milliy agentligi bilan hamkorlikda tashkil etilgan “Zo‘ravonlik va tazyiq qurbonlarining huquqiy himoyasini ta’minlash” mavzusidagi konferensiya bo‘lib o‘tdi, deb xabar bermoqda Oliy sud matbuot xizmati.
Prezidentning ijtimoiy himoya masalalari bo‘yicha maslahatchisi — Milliy agentlik direktori Mahmud Olloyorov, Oliy sud raisi Bahodir Islomov, bosh prokuror Nig‘matilla Yo‘ldoshev va bosh vazir o‘rinbosari, Oila va xotin-qizlar qo‘mitasi raisi Zulfiya Mahkamova so‘nggi yillarda mamlakatimizda xotin-qizlar va bolalarni zo‘ravonlikdan himoya qilish, ularning huquq va manfaatlarini ta’minlash, shuningdek, bolalarning to‘laqonli rivojlanishi uchun shart-sharoitlar yaratish borasida keng ko‘lamli ishlar amalga oshirilayotganini ta’kidladi. BMTning xotin-qizlarni kamsitishning barcha shakllariga barham berish va bola huquqlari to‘g‘risidagi konvensiyalari talablarini bajarishga alohida e’tibor qaratilmoqda.
Tomonlar maishiy va jinsiy zo‘ravonlikning oldini olish bo‘yicha ko‘rilgan chora-tadbirlar, mavjud muammolar va keyingi qadamlarni muhokama qildilar.
Ta’kidlanganidek, mamlakatimizda himoya orderlari tizimi takomillashtirilmoqda: ularni berish bilan birga huquqbuzar uchun “Inson” markazi bilan hamkorlikda xulq-atvorni tuzatish dasturi ishga tushirilmoqda. Zo‘ravonlikdan jabr ko‘rgan ayollar va bolalarga ijtimoiy xizmatlar ko‘rsatish standarti tasdiqlandi.
Avvalroq O‘zbekistonda ayollarga nisbatan tazyiq va zo‘ravonlik holatlari ko‘paygani haqida xabar berilgandi. Ko‘rsatkichning o‘sishi huquqiy xabardorlikning oshishi va xotin-qizlar huquqlariga rioya etilishini faol talab qilish bilan izohlandi.
2025-yil boshidan buyon O‘zbekistonda ayollarga nisbatan tazyiq va zo‘ravonlik holatlari 48,3 mingtani tashkil etib, o‘tgan yilgi ko‘rsatkichdan 121 foizga oshdi. Ichki ishlar vaziri o‘rinbosari Bekmurod Abdullayev bunday statistikaning sababini ayollarning huquqiy savodxonligini oshirish va huquqlarga rioya etilishini faol talab qilish bilan izohladi.
Izohlar