Ayrim o‘zbekistonliklarga isitish mavsumida milliondan tarqatiladi
Ko‘rsatilgan toifadagi fuqarolar “Mahalla yettiligi”ga murojaat qilishi kerak bo‘ladi.
Noyabr oyida isitish mavsumida kam ta’minlangan aholini qo‘llab-quvvatlash maqsadida bir martalik 1 million so‘mlik moddiy yordam ajratilishi Ijtimoiy himoya milliy agentligi tomonidan ma’lum qilindi.
Agentlik to‘lovga umid qilishi mumkin bo‘lgan oilalar toifalarini sanab o‘tdi:
- “Ijtimoiy himoya yagona reyestri” orqali bolalar nafaqasi yoki moddiy yordam oluvchi oilalar;
- “Kam ta’minlangan oilalar reyestri”dagi oilalar;
- “Mahalla yettiligi” tomonidan shakllantirilgan qo‘shimcha ro‘yxatga kiritilgan oilalar.
Qo‘shimcha ro‘yxatga quyidagi oilalar ustuvor tartibda kiritiladi:
- boquvchisini yo‘qotganlar;
- I yoki II guruh nogironligi bo‘lganlar;
- nogironligi bo‘lgan bolani tarbiyalayotganlar;
- isitish tizimi bo‘lmagan ko‘p kvartirali uylarda yashovchilar;
- bir uyda uch va undan ortiq oila yashaydigan;
- og‘ir bemorni parvarish qiluvchilar;
- yolg‘iz keksalar yoki nogironligi bo‘lgan shaxslar.
Mazkur toifaga kiruvchi fuqarolar joriy yilning 25-sentyabriga qadar “Mahalla yettiligi”ga murojaat qilishlari lozim.
Avvalroq Veolia Energy isitish mavsumiga tayyorgarlik doirasida poytaxt aholisiga murojaat bilan chiqqandi. Shuningdek, kompaniya quvurga zarar yetishi mumkinligi haqida ogohlantirdi.
Izohlar