Zelenskiy Ukrainaning O‘zbekistondagi elchisini almashtirdi
Prezident diplomatik korpus rotatsiyasini amalga oshirmoqda.
Ukrainaning favqulodda va muxtor elchisi Nikolay Doroshenko O‘zbekistondagi diplomatik missiyasini yakunlamoqda. Bu haqda u o‘zining ijtimoiy tarmoqlardagi sahifasida ma’lum qildi.
Elchining ta’kidlashicha, tegishli qaror Ukraina prezidenti Vladimir Zelenskiy tomonidan diplomatik korpus rotatsiyasi doirasida qabul qilingan.
“Bu mamlakatim rahbariyatiga, xalqimga bildirilgan eng yuksak ishonchdir va men buni oqlash uchun qo‘limdan kelgan barcha ishni qildim”, — deb yozdi u.
Shuningdek, Nikolay Doroshenkoning qo‘shimcha qilishicha, u O‘zbekistondagi faoliyati davomida mamlakat uchun qiyin bo‘lgan davrda uning manfaatlarini ifoda etish va himoya qilish sharafiga muyassar bo‘lgan.
“Mening vazifam bu haqiqatni aytish, haqiqatni o‘zbek jamiyatiga yetkazish, ularga bugungi kunda Ukraina qanday yashayotganini tushuntirish edi. Umid qilamanki, mening mehnatim tufayli o‘zbek muhitida haqiqat urug‘lari ko‘proq unib chiqadi”, — deya qo‘shimcha qildi u.
Izohlar