Namanganda Ukrainadagi harbiy harakatlarda ishtirok etgan o‘zbekistonlik qamaldi

Namangan viloyatida Rossiya va Ukraina o‘rtasidagi mojaroda ishtirok etgan 49 yoshli fuqaroga sud hukmi o‘qildi, deyiladi sud qarorida.

Ma’lumotlarga ko‘ra, 2025-yil aprel oyida erkak Rossiyaga borib, u yerda mamlakat Mudofaa vazirligi bilan shartnoma tuzib, “oddiy askar” harbiy unvonini olgan. Luganskda kichik tayyorgarlikdan o‘tgan erkak jangovar harakatlarda ishtirok etish uchun Ukraina hududiga yo‘l olgan.

May oyida mina portlashi oqibatida yaralangan o‘zbekistonlik davolanish uchun harbiy gospitalga borgan. Shundan so‘ng vataniga qaytib, o‘z ixtiyori bilan huquq-tartibot idoralariga murojaat qilgan. Shuningdek, fuqaro o‘zining shartnomasi, harbiy jetoni va tibbiy hujjatlarini tartib posbonlariga topshirdi.

Tergov davomida huquq-tartibot idoralari xodimlari erkak jangovar harakatlarda qatnashgani uchun 1 million rubl olganini aniqladi. Jinoyat ishlari bo‘yicha Papa tuman sudi uni Jinoyat kodeksining 154-moddasi (Yollanish) va 154-1-moddasi (Harbiy xizmatga, xorijiy davlatlarning xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirish, yollash) bo‘yicha aybdor deb topdi va 3 yil-u bir oy muddatga ozodlikdan mahrum qilish jazosi tayinladi.

Avvalroq Samarqandda Ukrainadagi urushda qatnashgan erkak uch yilga qamalgani haqida xabar berilgandi. O‘zbekistonlik taxminan bir yil davomida jangovar harakatlarda qatnashgan, so‘ngra yaralanganidan so‘ng elchixonaga murojaat qilgan va vataniga qaytgach, huquq-tartibot idoralariga aybini bo‘yniga olish to‘g‘risida murojaat qilgan.