Sea Breeze kurort majmuasi qurilishiga rasman ruxsat berildi

O‘zbekistonda Toshkent viloyatida Sea Breeze kurort majmuasini qurishga rasman ruxsat berildi, deb xabar bermoqda viloyat hokimligi matbuot xizmati.

Yil davomida faoliyat yuritadigan Sea Breeze Uzbekistan kurort majmuasi Bo‘stonliq tumani hududida 577 gektar maydonda quriladi va loyiha qiymati 5 mlrd dollarni tashkil etadi. Baholovchi tashkilot tomonidan Chorvoqdagi yerni 25 yilga ijaraga berishning baholangan qiymati 0,01 pasaytiruvchi koeffitsiyentni qo‘llagan holda 1,7 trln so‘mni tashkil etib, 17 mlrd so‘mlik yakuniy summa 5 yil davomida bo‘lib-bo‘lib to‘lanadi.

Vazirlar Mahkamasining “Sea Breeze Uzbekistan” yilbo‘yi dam olish maskanini qurish bo‘yicha yirik investitsiya loyihasini amalga oshirish chora-tadbirlari to‘g‘risida»gi qarori qabul qilindi. Unga ko‘ra:

• Chorvoq suv omboriga oqova suvlarni oqizish taqiqlanadi;
• barcha muhandislik va ekologik yechimlar Bosh prokuratura va Ekologiya vazirligi organlari bilan kelishiladi;
• har qanday qoidabuzarliklar aniqlangan taqdirda loyiha to‘xtatiladi, kontrakt bekor qilinadi, yer esa investorga qaytariladi;
• yashil zonalar barbod etilmaydi, balki ularning ekologik qiymatini hisobga olgan holda ko‘chirib o‘tkaziladi;
• tozalash inshootlari bilan bog‘liq barcha xarajatlar investor hisobidan amalga oshiriladi;
• shuningdek, qarorda jamoatchilik fikri inobatga olinishi, loyiha faqat shaffoflik va hisobdorlik asosida, davlat nazorati ostida amalga oshirilishi qayd etilgan.

Dam olish maskani suv ombori yaqinida joylashgani inobatga olinib, qaror bilan suv resurslarini muhofaza qilishga qaratilgan barcha ekologik talablarga qat’iy rioya etilishi belgilandi. Atrof-muhit holati, jumladan, suv sifati davlat organlarining doimiy nazoratida bo‘ladi. Suv havzasi va unga tutash hududlarning har qanday ifloslanishini istisno etadigan oqova suvlarni oqizish va tozalashning ishonchli tizimini yaratishga alohida e’tibor qaratiladi. Barcha muhandislik yechimlari ekologik xavfsizlik va barqaror rivojlanishga ustuvor ahamiyat bergan holda amalga oshiriladi.

Shu bilan birga, yuqoridagi ekologik talablarga rioya qilmaslik loyihani to‘xtatib turish va yer uchastkasini ijaraga olish huquqini bekor qilish uchun asos bo‘ladi.

Qarorning alohida bandida loyihaning amalga oshirilishi davlat organlarining qat’iy nazorati ostida bo‘lishi ta’kidlangan. Bosh prokuratura kurort majmuasi hududida barcha shaharsozlik va ekologik me’yorlarga rioya etilishi ustidan alohida nazorat o‘rnatadi. Vazirlar Mahkamasi va Bosh prokuratura loyiha yechimlarini kelishishdan boshlab, obyektlarni foydalanishga topshirishgacha bo‘lgan barcha jarayonlarning qonuniyligi va shaffofligiga mas’ul bo‘ladi. Bunday yondashuv majmuani qurish va undan foydalanishning hech bir jihati e’tibordan chetda qolmasligini, tabiat, davlat va fuqarolar manfaatlari ishonchli himoya qilinishini ta’minlaydi.

Kurort hududini rivojlantirish faqat majmuaning o‘zini qurish bilan cheklanib qolmaydi — loyiha doirasida unga tutash hududni har tomonlama obodonlashtirish ham ko‘zda tutilgan.

Kurort hududini rivojlantirish mintaqaning iqtisodiy salohiyatini mustahkamlashga va mahalliy aholi uchun yangi imkoniyatlar yaratishga xizmat qiladi. Infratuzilmaga sarmoya kiritish xizmat ko‘rsatish darajasini oshiradi va ko‘proq sayyohlarni jalb qiladi. Davlat nazorati barcha shaharsozlik va huquqiy talablarga rioya etilishini ta’minlaydi. Vakolatli organlar loyihani amalga oshirish bo‘yicha barcha jarayonlarning qonuniyligi va shaffofligini kafolatlaydi.

Loyihaning amalga oshirilishi innovatsiyalar, ekologiyaga g‘amxo‘rlik va ijtimoiy mas’uliyatni o‘zida mujassam etgan yangi muhitni shakllantirishga xizmat qilib, kurort hududlarini rivojlantirishga zamonaviy yondashuv namunasiga aylanadi.

Avvalroq Chorvoq sohilida ozarbayjonlik milliarder kurorti qurilishi boshlangani xabar berilgandi. Sea Breeze loyihasi umuman ekologik ekspertizadan o‘tmagan va jamoatchilik tomonidan ma’qullanmagan. Keyinroq, 23-iyul kuni Ekologiya vazirligi rahbari Aziz Abduhakimov Chorvoq suv omborida Sea Breeze Uzbekistan loyihasiga bag‘ishlangan matbuot anjumanida nutq so‘zladi.

Vazirning aytishicha, Chorvoqdagi Sea Breeze kurorti loyihasi jamoatchilik muhokamasiga qo‘yiladi. Bundan tashqari, Aziz Abduhakimov hozircha vazirlik loyiha bo‘yicha rasmiy hujjatlar olmaganini aytdi. Keyinroq Ekologiya vaziri maslahatchisi Rasul Kusherbayev loyihaga ekologik talablar qo‘yilishini ma’lum qildi.