Toshkent viloyatida erkak do‘konga qurol bilan kelib, sotuvchini kaltakladi — video
Ma’lum bo‘lishicha, jabrlanuvchi bosqinchining hamxonasi bo‘lgan.
13-noyabr kuni ijtimoiy tarmoqlarda ov miltig‘i ko‘targan erkak do‘kon sotuvchisini kaltaklagani aks etgan video tarqaldi. IIBB hodisaga izoh berdi.
Ma’lum bo‘lishicha, hujum 22-oktyabr kuni Toshkent viloyatida sodir etilgan. Ko‘ksaroy mahallasida yashovchi 33 yoshli erkak 2021-yildan buyon ovchilar jamiyatiga a’zo bo‘lgan. U 35 yoshli ayol ishlaydigan do‘konga qurol bilan kelgan. Boshqarma ma’lumotlariga ko‘ra, jabrlanuvchi hujumchining turmush o‘rtog‘i bo‘lgan.
Yuzaga kelgan mojaro tufayli u ayolga tahdid qilib, uni kaltaklagan. Mazkur holat yuzasidan Jinoyat kodeksining 109-moddasi 2-qismi (qasddan badanga yengil shikast yetkazish) bilan jinoyat ishi qo‘zg‘atilgan. Tergov boshlandi. Unga berilgan ovchilik guvohnomasi bekor qilinib, TOZ-34 miltig‘i olib qo‘yilgan.
Tan jarohatlari bo‘yicha tayinlangan sud-tibbiy ekspertizasi ayolning sog‘lig‘i qisqa muddatga yomonlashishiga olib kelgan yengil jarohatlar olganini aniqladi. Hozirda holat viloyat IIB tomonidan to‘liq nazoratga olingan, — deyiladi xabarda.
Avvalroq Toshkentda erkak sobiq xotinini ta’qib qilib, kaltaklayotgani haqida xabar berilgandi. Shunga qaramay, huquq-tartibot idoralari jabrlanuvchining himoya orderini uzaytirmagan va hatto ikkita hujumdan keyin ham ishni nazoratga olmagan.
Izohlar