O‘zbekistonliklar hujjatlarni telefondan ko‘rsatishi mumkin bo‘ladi
Ilova orqali ma’lumotlar taqdim etilganda, davlat idoralariga ularni qog‘oz shaklida talab qilish taqiqlanadi.
1-noyabrdan davlat xizmatlari veb-saytidagi ma’lumotlar qog‘oz shakliga tenglashtiriladi, deya xabar qildi Adliya vazirligi matbuot xizmati.
Jismoniy shaxslarning shaxsiy ma’lumotlari ularning shaxsiy kabineti orqali real vaqt rejimida taqdim etiladi. Davlat organlari va tashkilotlariga ma’lumotlarni mobil ilova yordamida taqdim etishda ularni qog‘oz shaklida talab qilish taqiqlanadi. Shuningdek, 2025-yil 1-noyabrdan:
- davlat xizmatlari markazlariga murojaat qilishda pensionerlar, homilador ayollar va 3 yoshgacha bo‘lgan bolasi bilan kelgan fuqarolarga navbatsiz imtiyoz beriladi;
- jismoniy shaxslarni yagona identifikatsiyalash tizimida (OneID) ro‘yxatdan o‘tkazishda shaxsni biometrik identifikatsiyalashning muqobil tartibi (Face ID) joriy etiladi;
- davlat xizmatlari markazlari Yagona portal orqali joriy etilgan barcha davlat xizmatlari bo‘yicha aholi va tadbirkorlarga xizmat ko‘rsatish huquqiga ega bo‘ladi.
Eslatib o‘tamiz, FHDY organlarida ro‘yxatdan o‘tishda tibbiy ko‘rik natijalarini talab qilish to‘xtatiladi. 2028-yilga borib YIDXP orqali ko‘rsatiladigan xizmatlar sonini 900 taga yetkazish rejalashtirilgan.
Izohlar