O‘zbekistonning ikki shahrida fuqarolar soddalashtirilgan tartibda jami yillik daromadlari to‘g‘risidagi deklaratsiyalarni taqdim etishi, shuningdek, Soliq ilovasi orqali qo‘shimcha ma’lumotlarni kiritishi mumkin bo‘lgan tajriba boshlanadi, deyiladi prezident qarorida.
Ma’lumotlarga ko‘ra, tajriba loyihasi 2026-yil 1-martdan boshlab Navoiy va Chirchiq shaharlarida o‘tkazilishi rejalashtirilgan. Xususan, soliq organlari xodimlari, shuningdek, ushbu shaharlarda ro‘yxatdan o‘tgan jismoniy shaxslar deklaratsiyalarni maxsus onlayn platforma orqali soddalashtirilgan tartibda topshiradilar.
Eksperiment doirasida ishtirokchilarning xarajatlari Soliq mobil ilovasida ro‘yxatdan o‘tkazilgan fiskal belgili xarid cheklari va elektron hisobvaraq-fakturalar, shuningdek, boshqa idoralar va vazirliklarning ma’lumotlari asosida hisoblanadi. Soliq organlari soliq bazasini yillik daromad va xarajatlar to‘g‘risidagi raqamli ma’lumotlarga tayanadi, ma’lumotlar yetarli bo‘lmagan taqdirda, fuqarolar Soliq ilovasi orqali qo‘shimcha ma’lumotlarni mustaqil ravishda kiritishlari mumkin bo‘ladi.
Bunda aniqlashtirilgan holatlar bo‘yicha mutaxassislar tomonidan qo‘shimcha soliq to‘lovlari hisoblanmaydi, shuningdek huquqiy ta’sir choralari qo‘llanilmaydi. Soliq qo‘mitasi va Iqtisodiyot va moliya vazirligiga Adliya vazirligi, Raqamli texnologiyalar vazirligi va Hisob palatasi bilan birgalikda deklaratsiyalashning eksperimental tizimini joriy etish to‘g‘risidagi qaror loyihasini ishlab chiqish va ikki oy muddatda — fevral oyining o‘rtalariga qadar Vazirlar Mahkamasiga kiritish topshirildi.
Avvalroq ko‘chmas mulk va qurilish materiallari uchun soliqlar bozor narxlarida hisoblanishi xabar qilingandi. Kameral tekshiruvlar vaqtida soliq organlari qo‘shimcha hujjatlarni ko‘rib chiqishi shart bo‘ladi.
