O‘zbekiston Hindistonning Chirchiqdagi tibbiyot oliy o‘quv yurtiga kirmaslik haqidagi chaqirig‘iga javob qaytardi

Hindiston Milliy tibbiyot komissiyasi (NMC) chet elda o‘qishni rejalashtirayotgan hindistonlik talabalarni to‘rtta oliy o‘quv yurtiga kirmaslikdan ogohlantirdi, ulardan biri Toshkent davlat tibbiyot universitetining Chirchiq filiali bo‘lib, u chet ellik talabalarni tayyorlashda bir nechta talablarni buzganlikda ayblangan. Toshkent davlat tibbiyot universiteti matbuot xizmati holatga izoh berdi.

OTMning ma’lum qilishicha, muassasa akademik va klinik standartlarga qat’iy rioya qiladi. Bugungi kunda filialda 801 nafar talaba tahsil olmoqda. Ular ikkita fakultetda 4 ta bakalavriat ta’lim yo‘nalishi va 13 ta klinik ordinatura mutaxassisligi bo‘yicha tahsil olmoqda. Bundan tashqari, OTMda xorijliklar, jumladan, 5 nafar Hindiston, 1 nafar Iordaniya, 8 nafar Pokiston va 7 nafar Misr fuqarolari tahsil olmoqda.

Qayd etilishicha, filialda o‘quv jarayoni O‘zbekistondagi mavjud tibbiy ta’lim standartlari va Jahon tibbiy ta’lim federatsiyasi talablariga javob beradigan zamonaviy o‘quv dasturlari asosida tashkil etilgan. Toshkent viloyati va Chirchiq shahridagi 10 ta klinik bazada talabalar malakali mutaxassislar ko‘magida amaliy ko‘nikmalarga ega bo‘lmoqda.

Ta’kidlanishicha, filial Jahon tibbiy ta’lim federatsiyasi va Tibbiy ta’limni rivojlantirish xalqaro jamg‘armasi tomonidan qo‘llab-quvvatlanadigan Jahon tibbiyot oliy o‘quv yurtlari ma’lumotnomasiga kiritilgan. Qayd etilishicha, universitet zamonaviy o‘quv binolari, laboratoriyalar, simulyatsiya markazlari, elektron ta’lim platformalari, axborot-resurs markazi va talabalar turar joyi bilan ta’minlangan bo‘lib, barcha sharoitlarga ega.

Talabalar uchun ta’lim muassasasi hududida shaffoflik, akademik erkinlik, tenglik sharoitlari yaratilgan. OTMda bosim va majburlashga yo‘l qo‘yilmaydi, o‘qish shartlari, narxi va akademik talablar haqidagi barcha ma’lumotlar rasmiy manbalarda e’lon qilinadi.

Shuningdek, ta’lim muassasasida talabalar, jumladan, hindistonlik talabalar ham muvaffaqiyatli tahsil olayotganini ta’kidladi. Ular uchun maxsus moslashuv dasturlari, ingliz tilidagi o‘quv guruhlari, shuningdek, klinik amaliyot o‘tash imkoniyatlari yaratilgan. Ta’kidlanganidek, filial nufuzli xalqaro universitetlar va klinik markazlar bilan doimiy hamkorlik qilib kelmoqda.

Universitet ma’muriyati Hindiston Milliy tibbiy komissiyasi bilan ochiq muloqotga tayyorligini bildirdi. Qayd etilishicha, Toshkent davlat tibbiyot universiteti Chirchiq filiali Hindiston Milliy tibbiy komissiyasi tomonidan bildirilgan fikr-mulohazalarga jiddiy yondashmoqda. Shu bilan birga, muassasa Hindiston Milliy tibbiy komissiyasi tomonidan e’lon qilingan ma’lumotlar joyida o‘rganilmagani va asossiz ekanligini ta’kidladi.

Biz Hindiston bilan ta’lim sohasida do‘stona va samarali hamkorlikni yanada mustahkamlashdan manfaatdormiz hamda har qanday o‘rganish va muloqot uchun ochiqmiz. Asossiz xabarlar bilan universitet obro‘sini to‘kishga urinishlarni qat’iyan rad etamiz.

Xalqaro hamjamiyatni, ayniqsa, Hindistondagi talabalar va ularning ota-onalarini Toshkent davlat tibbiyot universitetining Chirchiq filialida sifatli tibbiy ta’lim va uning xalqaro standartlarga muvofiqligi doimiy ravishda ta’minlanayotganiga ishontirmoqchimiz, deyiladi xabarda.

Eslatib o‘tamiz, Toshkentdagi tibbiyot oliygohida tahsil olayotgan xorijlik Reddit sahifasi orqali ta’lim tizimidan shikoyat qilgandi. Hindistonlik birinchi kurs talabasining so‘zlariga ko‘ra, Toshkent tibbiyot akademiyasi — bu qo‘rqinchli tush.