O‘zbekistonda transplantatsiyaga ruxsat berish tartibi tasdiqlandi
Ba’zi hollarda operatsiyani o‘tkazish rad etiladi.
O‘zbekistonda transplantatsiya uchun tibbiy xulosa berish tartibi, shuningdek, uni berishni rad etish mumkin bo‘lgan shartlar tasdiqlandi, deyiladi hukumat qarorida.
Ma’lumotlarga ko‘ra, hujjatni olish uchun retsipiyent va tirik donor 3 oy ichida tibbiy ko‘rikdan o‘tishi kerak. Ko‘rik natijalari va shifokorlar xulosasi asosida davlat tibbiyot muassasalarining shifokorlar kengashi tegishli xulosa beradi.
Xususan, kengash retsipiyentga inson a’zolari yoki to‘qimalarini transplantatsiya qilish zarurligi va donorning transplantatsiyaga yaroqliligi to‘g‘risida tibbiy xulosa beradi. Shu bilan birga, transplantatsiya muolajasi natijasida insonga zarar yetkazilib, ko‘rish, nutq, eshitish qobiliyatining yo‘qolishi, ruhiy faoliyatining buzilishi yoki mehnat qobiliyatining 33 foizdan ortiq barqaror yo‘qolishiga sabab bo‘lgan hollarda xulosa berish rad etiladi.
Avvalroq prezident tibbiyotni xalqqa yaqinlashtirish bo‘yicha topshiriq bergani xabar qilingandi. Majlisda Shavkat Mirziyoyevga sohani raqamlashtirish bo‘yicha rejalar namoyish etilgan.
Izohlar