Toshkent viloyatida mushtlashuvda erkak pichoqlandi
Onasining so‘zlariga ko‘ra, jabrlanuvchi yetti joyidan pichoqlangan holda shifoxonaga yetkazilgan.
Toshkent viloyatida yosh yigit janjal vaqtida pichoqlab o‘ldirildi, deb xabar bermoqda Millar dasturi.
Ma’lumotlarga ko‘ra, voqea 11-iyul kuni Chinoz tumani “Yaxshi niyat” mahallasida joylashgan bozor hududida sodir bo‘lgan. 26 va 23 yoshli ikki erkak o‘rtasida janjal kelib chiqqan, unda 23 yoshli fuqaro raqibiga bir necha marta pichoq bilan zarba bergan.
Jabrlanuvchi Yangiyo‘l tumani tibbiyot birlashmasiga olib borilgan va shifokorlar yordamiga qaramay, yigit vafot etgan. Marhumning onasi o‘g‘lining o‘limiga bir guruh shaxslar aloqadorligini aytdi.
O‘g‘lim yetti joyidan pichoqlangan. Shundan so‘ng u jonlantirish bo‘limiga yotqizilgan. Birinchi yordam ko‘rsatilgandan so‘ng, u vafot etdi. O‘g‘lim ichmas, chekmas, sport bilan shug‘ullanardi. Bir kishi buni uddalay olmaydi, deydi ayol.
Holat yuzasidan Jinoyat kodeksining 97-moddasi 1-qismi (Qasddan odam o‘ldirish) bilan jinoyat ishi qo‘zg‘atilib, gumonlanuvchi fuqaro qo‘lga olingan. Hozirda tergov harakatlari olib borilmoqda.
Avvalroq Jizzaxda muqaddam sudlangan erkak hamkasbini pichoqlab, uyini yoqib yuborgani haqida xabar berilgandi. Tanishlar ishdan keyin birga ichishga qaror qilgan, ammo ular o‘rtasida janjal boshlangan.
Izohlar