3-sentyabr kuni ijtimoiy tarmoqlarda O‘zbekiston elchixonasi yaqinida Rossiya fuqarosi kaltaklangani haqida xabar tarqaldi. Elchixona matbuot xizmati hodisaga izoh berdi.
Readovka xabariga ko‘ra, erkak O‘zbekiston elchixonasi yonidan it bilan sayrdan qaytayotganda noto‘g‘ri qo‘yilgan mashinaga ko‘zi tushgan. U o‘tirganlarga tanbeh berdi — bunga javoban avval do‘q-po‘pisa eshitdi, keyin esa kaltak yedi. Jabrlanuvchi hujum qilganlar O‘zbekiston elchixonasi xodimlari ekanini aytgan.
Uning so‘zlariga ko‘ra, go‘yoki ishchilar uning yuzi tasvirlangan yozuv tarmoqqa tushmasligi uchun telefonini sindirishga uringan. Erkak politsiyaga ariza yozdi. Uning ta’kidlashicha, hujum qilganlar oldiga elchixonadan odamlar kelgan.
O‘z navbatida, O‘zbekistonning Rossiyadagi elchixonasi hodisaga izoh berdi. Vazirlik ma’lumotlariga ko‘ra, voqea 31-avgust kuni Moskvada sodir bo‘lgan. Ma’lum qilinishicha, fotosuratlarda ko‘rsatilgan avtomobil va hodisada ishtirok etgan odamlarning Elchixonaga hech qanday aloqasi yo‘q.
“Avtotransport vositasining diplomatik raqami boshqa davlatning diplomatik vakolatxonasiga tegishli bo‘ladi. Sodir bo‘lgan voqea uchun javobgarlikni Elchixonaga yuklashga qaratilgan har qanday urinishlar asossiz va nomaqbuldir. Shu munosabat bilan Elchixona jamoatchilik va ommaviy axborot vositalarini tekshirilmagan ma’lumotlarni tarqatmaslikka chaqiradi”, — deyiladi xabarda.
Eslatib o‘tamiz, Navoiyda mast holatdagi restoran mijozi erkakni kaltaklagandi. Hujumchi Paralimpiya chempioni Elbek Sultonovning do‘sti bo‘lib chiqdi, u yonida bo‘lgan, ammo mojaroda ishtirok etmagan.
