O‘zbekistonda o‘nlab boshqaruv kompaniyalari aholining pullarini o‘zlashtirgani aniqlandi
Talon-toroj qilingan to‘lovlarning umumiy miqdori 26 mlrd so‘mni tashkil etgan.
Qurilish va uy-joy kommunal xo‘jaligi vaziri o‘rinbosari Ozoda Jo‘rayevning ma’lum qilishicha, O‘zbekistonda boshqaruv kompaniyalari ko‘p qavatli uylarda yashovchilarning deyarli 26 mlrd so‘mlik to‘lovlarini o‘zlashtirgan.
Ma’lumotlarga ko‘ra, 2025-yil boshidan buyon vazirlik 417 ta xizmat ko‘rsatuvchi kompaniyani tekshirgan. Natijada ularning 83 tasida uy-joy mulkdorlari mablag‘larini o‘zlashtirish bilan bog‘liq jiddiy moliyaviy huquqbuzarliklarga yo‘l qo‘yilganligi aniqlandi. O‘zlashtirilgan pullarning umumiy miqdori 26 mlrd so‘mni tashkil etgan.
Ushbu holatlar bo‘yicha barcha materiallar mutaxassislar tomonidan huquqni muhofaza qilish organlariga topshirildi, qolgan tashkilotlarga aniqlangan qoidabuzarliklarni bartaraf etish bo‘yicha majburiy ko‘rsatmalar berildi.
Shuningdek, ushbu davrda 158 ta boshqaruv kompaniyasi jami 587 mln so‘m jarimaga tortilgan. Vazirlik vakilining qayd etishicha, endilikda bunday tashkilotlarga nisbatan har bir sodir etilgan huquqbuzarlik uchun ma’muriy jazo choralari qo‘llanilmoqda. Ilgari javobgarlik yiliga bir marta yuzaga kelardi.
Avvalroq O‘zbekistonda boshqaruv kompaniyalari reyestri yaratilishi haqida xabar berilgandi. Ro‘yxatdan o‘tish uchun pasport taqdim etish va boj to‘lash kerak bo‘ladi.
Izohlar