2025-yil oxirigacha hukumat aholini suv bilan ta’minlash darajasini 22,3 foizga yetkazishni rejalashtirmoqda

O‘zbekistonda oqova suvlarni tozalash maqsadida bir qator davlat-xususiy sheriklik loyihalarini amalga oshirish rejalashtirilmoqda. Qurilish va uy-joy kommunal xo‘jaligi vaziri Sherzod Hidoyatovning ma’lum qilishicha, bu loyihalar vaziyatni yaxshilashga yordam beradi.

Vazirlik vakilining aytishicha, eng yirik loyihalardan biri Toshkentning Sergeli tumanida joylashgan “Salar” oqova suv tozalash inshootlaridan chiqayotgan yoqimsiz hid muammosini hal qilish bo‘ladi. Xususan, ushbu muammoni hal qilish uchun hukumat Yangi Toshkent hududida kuniga 1 million kub metr oqova suv inshootini qurishni rejalashtirmoqda.

Qiymati 1 mlrd dollar bo‘lgan loyihani BAA kompaniyasi bilan birgalikda amalga oshirish rejalashtirilgan. Rejaga ko‘ra, “Salar” va “Bektemir” tozalash inshootlaridan chiqayotgan oqova suvlar Surum mahallasida barpo etiladigan yangi obyektga yo‘naltiriladi. Shuningdek, hokimiyat 42 km uzunlikdagi kanalizatsiya kollektorini qurishni rejalashtirmoqda.

Qayd etilishicha, yangi majmua foydalanishga topshirilgach, eski inshootlar faoliyati to‘xtatiladi, chunki obyekt hududdagi oqova suvlarni to‘liq tozalashni ta’minlay oladi. Bundan tashqari, vazirlik vakili BAA bilan hamkorlikda qurilishi rejalashtirilgan yana ikkita loyiha haqida so‘zlab berdi.

Xususan, Qashqadaryo viloyatida qiymati 600 million dollarlik oqova suv tizimini modernizatsiya qilish, shuningdek, oqova suvlarni qayta ishlash, 50 million dollarlik yoqilg‘i mahsulotlari ishlab chiqarish va oshxonalardan kelayotgan yog‘larni ushlab qoluvchi filtrlar o‘rnatish loyihasini amalga oshirish rejalashtirilgan.

Shuningdek, mutaxassislar Saudiya Arabistoni kompaniyalari bilan birgalikda Farg‘ona va Jizzax viloyatlarida oqova suv tizimlarini joriy etish, Namangan viloyatidagi tozalash inshootlarini rekonstruksiya qilish va ularning quvvatini kuniga 100 ming kub metr oqova suvni tozalash darajasiga yetkazishni rejalashtirmoqda.

Sherzod Hidoyatovning ta’kidlashicha, loyiha Nereda texnologiyasidan foydalanishni nazarda tutadi, uning doirasida mutaxassislar “faol loyqa”ni granula shaklida o‘stiradilar va oqova suvlarni yanada samarali tozalash uchun kislorod bilan to‘yintiradilar. Vazirlik vakilining ta’kidlashicha, loyihaning amalga oshirilishi suvni tozalash samaradorligini oshirish va qo‘shimcha 200 ming kishiga xizmat ko‘rsatishni yaxshilash, shuningdek, 2025-yilda aholini markazlashtirilgan kanalizatsiya xizmatlari bilan qamrab olish darajasini 22,3 foizga yetkazish imkonini beradi.

Avvalroq O‘zbekiston aholisining qariyb 20 foizi hali ham suvdan foydalanish imkoniyatiga ega emasligi haqida xabar berilgan edi. Eng past natija Qashqadaryo viloyatida qayd etildi.