Navoiyda mahalla raisi murojaatchi ayolga tegajog‘lik qilgani uchun uch sutkaga qamaldi
Davlat xizmatchisi jabrlanuvchiga nomaqbul xabarlar yuborgan va ish joyida spirtli ichimlik iste’mol qilgan.
“Ayollar daftari”ga kiritishni so‘rab kelgan ayolga tegajog‘lik qilgani uchun mahalla raisi 3 sutkaga qamaldi, deb xabar bermoqda NeMolchi.
Voqea 19-iyun kuni Navoiy viloyatining Uchquduq tumanida sodir bo‘lgan. 18 iyun kuni ayol “Ayollar daftari”ga kiritishni so‘rab mahalla qo‘mitasiga murojaat qilgan. Biroq davlat xizmatchisi undan ertaga kelishini so‘ragan. Kechqurun ayolning telefoniga raisdan “hech kim yo‘qligida yonimga keling”, “qo‘mita binosiga uchrashuvga tayyorlanib keling” degan xabarlar kelib tushdi.
19-iyun kuni taxminan soat 13:00 da ayol yana kelib, mahalla raisi elektrchi bilan birga o‘z xonasida spirtli ichimlik ichayotganini ko‘rgan. Kechki payt u yuborgan xabarlar bo‘yicha izoh talab qilib, o‘z noroziligini bildirgan va hodisa yuzasidan huquqni muhofaza qilish organlariga murojaat qilgan.
Sudda ayblanuvchi pushaymonligini bildirdi. U o‘z harakatlarini jabrlanuvchiga nisbatan yomon niyati yo‘qligi bilan oqlamoqchi bo‘lgan va suddan jazoni yengillashtirishni so‘ragan. 2025-yil 4-sentyabrda u 41-1-modda (Shahvoniy shilqimlik) bilan aybdor deb topildi. Unga 3 sutka qamoq jazosi berildi.
Ushbu voqea shuni yaqqol ko‘rsatadiki, o‘ziga tazyiq o‘tkazish va o‘z mavqeini suiiste’mol qilishga yo‘l qo‘ygan odam rahbarlik lavozimlarini egallashi va ayniqsa ayollar bilan ishlashi mumkin emas va kerak emas. Sud qarorida erkak mahalla raisi lavozimidan chetlashtirilgani yoki chetlashtirilmagani haqida hech narsa aytilmagan, — deyiladi xabarda.
Eslatib o‘tamiz, Jizzaxda taksi haydovchisi qizga tegajog‘lik qilib, jinsiy aloqa qilishni taklif qilgan va unga pornografiya yuborgan. Sud erkakni panjara ortiga jo‘natdi, telefon esa davlat foydasiga musodara qilishga qaror qildi.
Izohlar