O‘zbekistonda issiqlik va issiq suv tariflari yana oshirilishi mumkin

O‘zbekistonda kuz o‘rtalariga kelib issiqlik va issiq suv tariflari yana oshirilishi mumkin, deya ma’lum qildi Veolia Energy Tashkent bosh direktori Sevara Pardayeva.

Xalq deputatlari shahar kengashi yig‘ilishida kompaniya vakilining ta’kidlashicha, hozirgi vaqtda iste’molchilar ushbu xizmatlar to‘liq tannarxining atigi 18 foizini to‘laydilar, qolgan qismi esa davlat byudjeti hisobidan qoplanadi. Sevara Pardayevaning ta’kidlashicha, 2030-yilga borib mamlakatda subsidiyalardan butunlay voz kechish va tarifni iste’molchilar tomonidan yuz foiz to‘lashga o‘tish rejalashtirilgan.

Tarifning eng yaqin ko‘tarilishi kuzning o‘rtalarida kutilmoqda. Agar u ma’qullansa, 1 oktyabrga qadar aholi uchun tariflar 15 foizga, yuridik shaxslar uchun 40 foizga, budjet tashkilotlari uchun 19 foizga oshiriladi. Kompaniya bosh direktorining so‘zlariga ko‘ra, 2019 yilda ishlab chiqilgan davlat-xususiy sheriklik loyihasi shartlariga ko‘ra, tariflar har yili 30 foizga oshirilishi kerak edi.

Biroq amalda ular 2022-yilga kelibgina o‘sa boshladi. Sevara Pardayevaning ta’kidlashicha, agar ular har yili oshirilmasa, kelajakda narxlarni 40-50 foizga oshirishga to‘g‘ri keladi. Kompaniya vakilining eslatishicha, 2024-yilda isitish va issiq suv ta’minoti narxlari ikki marta 15 foizga oshgan, kompaniyaning o‘zi esa biznes uchun tariflarni 50 foizga oshirishni taklif qilgan.

Oqibatda kompaniya qariyb 75 milliard so‘m mablag‘ni ololmay qolgan. 2025-yilda Veolia Energy yana tariflarni 50% ga oshirishni talab qildi, biroq yuridik shaxslar uchun 40% va byudjet tashkilotlari uchun 19% ga oshirishga kelishib olindi. Shu munosabat bilan Sevara Pardayeva faqat Toshkent shahrida tariflar o‘rtasida tafovut mavjudligini, hududlarda esa yuridik shaxslar ham, byudjet xodimlari ham xizmatlar uchun bir xil haq to‘lashlarini ta’kidladi.

Bosh direktorning ta’kidlashicha, ular o‘rtasidagi farq davlat byudjetidan qoplanar ekan, bu ham shahar moliyasiga qo‘shimcha yuk bo‘ladi. Hozirda poytaxt aholisi 1 gigakaloriya uchun QQSsiz 121,6 ming so‘m to‘laydi, agar tariflar oshirilishi tasdiqlansa, narx 139 ming so‘mgacha oshadi. Shuningdek, yuridik shaxslar uchun xizmatlar narxi 342,3 ming so‘mgacha, byudjet tashkilotlari uchun esa 954,3 ming so‘mgacha oshiriladi.

Avvalroq Toshkentda issiqlik va issiq suv tariflarini ikki baravar oshirishdan voz kechishga qaror qilingani haqida xabar berilgan edi. Narxlarni indeksatsiya qilish faqat bir marta amalga oshiriladi.