Toshkent hokimligi quruvchilar tomonidan qonun va me’yorlarning buzilishiga munosabat bildirdi

Toshkent shahar hokimligi qurilishi tugallanmagan yangi uylardan uy sotib olib, kvartira va pulsiz qolayotgan fuqarolar va quruvchilarga murojaat qildi.

Ma’muriyatning ta’kidlashicha, so‘nggi oylarda ayrim quruvchilar tomonidan qurilish me’yorlari va qonunchilikni buzish holatlari ko‘plab aniqlanmoqda. Ularning ayrimlari tegishli ruxsat beruvchi hujjatlar, ekspertizalar va texnik xulosalarsiz qurilishni boshlagan, shuningdek, uy-joylarni fuqarolarga noqonuniy sotishga uringan.

“Oqibatda bunday harakatlar ayrim yurtdoshlarimizning nopok kompaniyalarga ishonib, o‘z jamg‘armalarini yo‘qotib, uy-joysiz qolishiga olib kelmoqda”, — deyiladi xabarda.

Toshkent shahar hokimligi mutasaddi tuzilmalar bilan birgalikda bu borada prinsipial va qat’iy pozitsiyasini bildirdi. Poytaxtning bir qator tumanlarida to‘liq hujjatlar to‘plamiga ega bo‘lmagan 59 ta obyektda qurilish ishlari to‘liq to‘xtatilgan, obyektlar elektr ta’minotidan uzilgan. Qurilish maydonlarida nazorat va monitoring ishlari davom ettirilib, har bir qonunbuzilish holati yuzasidan qonuniy choralar ko‘riladi.

Aholi uy-joy sotib olishda o‘ta ehtiyotkor bo‘lishga va quyidagi tavsiyalarga amal qilishga chaqirildi:

• sotib olinayotgan ko‘chmas mulkka doir barcha hujjatlarning (kadastr, ekspertizalar va kengashlarning xulosalari, texnik ko‘rik dalolatnomasi) asl nusxalarini talab qilish va ularni sinchiklab tekshirish;
• sotuvchilarga naqd pul yoki norasmiy yo‘llar bilan pul bermaslik, shartnomaning barcha bandlarini diqqat bilan o‘rganish;
• Quruvchi yoki obyektning qonuniyligiga ozgina shubha tug‘ilsa, shuningdek, kompaniya hujjatlarni taqdim etishni kechiktirsa, Toshkent shahar hokimligining rasmiy botiga murojaat qilishingiz mumkin.

Hurmatli tadbirkor va quruvchilar! Qurilish yoki savdo faoliyatini boshlashdan oldin, barcha kerakli hujjatlarni rasmiylashtiring. Toshkent shahar hokimligi qurilish talablarining har qanday buzilishi va fuqarolar manfaatlariga zarar yetkazuvchi xatti-harakatlarga nisbatan qat’iy va murosasiz munosabatda bo‘ladi.

Eslatib o‘tamiz, Strong Cities kompaniyasi rahbari juda yirik miqdordagi firibgarlik ishi bo‘yicha hibsga olingandi. Huquqbuzarlar kompaniyani ro‘yxatdan o‘tkazmasdan va tegishli hujjatlarsiz ochishgan. Bundan oldin uysiz va pulsiz qolgan aholi hokimiyat binosiga yig‘ilgan.