Toshkent aholisi arzon narxlardagi oziq-ovqat yarmarkalarida narxlar oshirib yuborilganidan shikoyat qildi
Shaffoflikni ta’minlash maqsadida poytaxt hokimligi kameralar o‘rnatishni boshladi.
Toshkentda arzon narxlardagi oziq-ovqat mahsulotlari yarmarkalarida shaffoflik kuchaytirila boshlandi, deya xabar bermoqda hokimlik matbuot xizmati.
Shahar hokimligi va Iqtisodiy jinoyatlarga qarshi kurashish departamenti tashabbusi bilan aholiga qulaylik yaratish va arzon narxlarda oziq-ovqat mahsulotlari bilan ta’minlash maqsadida poytaxt bozorlarida maxsus savdo yarmarkalari tashkil etildi.
Ijtimoiy tarmoqlarda ayrim peshtaxtalarda ko‘rsatilgan narxlardan farq qiluvchi narxlarda sotilish holatlari kuzatilgani haqida xabarlar tarqaldi. Bu esa shaharliklarning noroziligiga sabab bo‘ldi. Shu bois oziq-ovqat yarmarkalarida shaffoflikni ta’minlash, narx-navoni nazorat qilish va sun’iy oshirishga yo‘l qo‘ymaslik bo‘yicha qo‘shimcha choralar ko‘rilmoqda.
Xususan, bunday peshtaxtalarga kuzatuv kameralari o‘rnatish boshlandi. Bugungi kunda Mirobod dehqon bozori va Chorsudagi “Eski Jo‘va” dehqon bozoriga kamera o‘rnatish ishlari yakunlangan.
Mazkur yo‘nalishdagi ishlar davom ettirilib, tez orada poytaxtning barcha yirik bozorlarida arzon narxlardagi oziq-ovqat yarmarkalari tashkil etilib, videokuzatuv kameralari o‘rnatiladi.
Izohlar