O‘zbekistonda voyaga yetmaganlar uchun jinoiy javobgarlik yengillashtiriladi
Senatorlar bunday sharoitlar sudlanganlik tamg‘asisiz hayotni davom ettirish uchun sharoit yaratishiga umid qilmoqda.
O‘zbekistonda o‘ta og‘ir bo‘lmagan jinoyat uchun jazo muddatini o‘tagan voyaga yetmaganlar sudlanmagan deb hisoblanadi, deb xabar bermoqda Qonunchilik palatasi matbuot xizmati.
Statistik ma’lumotlarga ko‘ra, 2023-yilda O‘zbekistonda 1 911 nafar voyaga yetmagan shaxs jinoiy javobgarlikka tortilgan va sudlangan bo‘lsa, 2024-yilda ularning soni 2 214 nafarga yetgan. Shu bilan birga, 2024-yilda voyaga yetmaganlar tomonidan sodir etilgan jinoyatlarning 1 238 tasi ijtimoiy xavfi katta bo‘lmagan, yana 855 tasi o‘rtacha og‘irlikdagi jinoyatlardir.
Shu munosabat bilan mamlakatda uncha og‘ir bo‘lmagan jinoyati uchun jazoni o‘tab bo‘lgan shaxslarga, basharti ular 18 yoshga to‘lguniga qadar uni sodir etgan bo‘lsa, sudlanganlik maqomini bermaslik taklif qilinmoqda. Shuningdek, qonunda voyaga yetmaganlarga nisbatan ozodlikni cheklash va ozodlikdan mahrum qilishning eng kam muddati olti oydan bir oygacha qisqartirilishi nazarda tutilmoqda.
Senatorlar bunday shart-sharoitlar voyaga yetmaganlarga nisbatan jinoiy javobgarlikni yanada liberallashtirishga ko‘maklashadi va sudlanganlik tamg‘asisiz hayotni davom ettirish uchun sharoit yaratadi, deb umid bildirmoqda. Mazkur qonun loyihasi senatorlar tomonidan ma’qullanib, kuchga kirguniga qadar prezident tomonidan imzolanishi kerak edi.
Avvalroq, O‘zbekistonda qarindoshlarining sudlanganligi sababli ishdan bo‘shatish taqiqlanishi haqida xabar berilgandi. Qonun fuqarolarni himoya qilishning huquqiy kafolatlarini yanada mustahkamlashga xizmat qilishi ko‘zda tutilgan.
Izohlar