O‘zbekistonda “Toza havo” aksiyasining ikkinchi bosqichi boshlandi
Tadbir avtotransportdan chiqadigan zararli chiqindilarni kamaytirishga qaratilgan.
O‘zbekistonda avtotransport vositalaridan zararli chiqindilarni kamaytirishga qaratilgan “Toza havo” aksiyasining ikkinchi bosqichi boshlandi, deb xabar bermoqda Ekologiya, atrof-muhitni muhofaza qilish va iqlim o‘zgarishi vazirligi axborot xizmati.
Ma’lumotlarga ko‘ra, ikkinchi bosqich 10-avgustdan boshlanib, butun mamlakat bo‘ylab 10-sentyabrgacha davom etadi, shundan so‘ng Toshkentda boshlanib, 10-oktyabrda yakunlanadi. Qayd etilishicha, tadbir Ekologiya vazirligi tomonidan Ichki ishlar vazirligi bilan hamkorlikda “Atmosfera havosini muhofaza qilish to‘g‘risida”gi va “Ekologik nazorat to‘g‘risida”gi qonunlar ijrosi doirasida amalga oshirilmoqda.
Ushbu aksiya foydalanishda bo‘lgan avtotransport vositalarining ekologik holati va chiqindi gazlar tarkibidagi ifloslantiruvchi moddalarning belgilangan me’yorlarga muvofiqligi ustidan nazoratni amalga oshirishga yordam beradi.
Avvalroq Navoiyda havoning ifloslanishi sababli o‘nlab korxonalar faoliyati to‘xtatilgani haqida xabar berilgandi. Shuningdek, mutaxassislar noqonuniy ravishda ohak ishlab chiqarib, havoni ifloslantirgan 24 nafar fuqaroni jarimaga tortdi.
Izohlar