O‘zbekistonda iqlim ta’limi orqali yoshlar o‘rtasida yetakchi kadrlar shakllantiriladi

“O‘zbekistonda iqlim ta’limi orqali yoshlarning yetakchilik qobiliyatlarini kuchaytirish va rivojlantirish” loyihasi ishga tushirildi, deb xabar bermoqda MMTV axborot xizmati.

Ma’lumotlarga ko‘ra, tashabbus BMTning O‘zbekistondagi Taraqqiyot dasturi va “Ta’lim hamma narsadan ustun” jamg‘armasi, Maktabgacha ta’lim vazirligi va “Zamin” xalqaro jamoat fondi ko‘magida amalga oshirilishi rejalashtirilgan. Uning qiymati 7,5 mln dollarni tashkil etadi va uch yil davom etadi. Qayd etilishicha, u 1,3 million yoshni qamrab oladi va ularga iqlim bo‘yicha yetakchilik ko‘nikmalarini o‘rgatishi mumkin.

Xususan, loyiha doirasida quyidagilar rejalashtirilgan:

• iqlim ta’limi va atrof muhitni asrash tamoyillari umumta’lim maktablarining o‘quv dasturlariga kiritiladi;
• 50 ming nafar pedagoglarning iqlimga oid darslarni o‘tkazish bo‘yicha malakasi oshiriladi;
• respublikadagi 7 ta viloyat maktablariga 3 000 ta o‘quv-uslubiy to‘plamlar taqdim etiladi;
• 4 ming nafar o‘quvchi-yoshlar qayta tiklanuvchi energiya manbalari va iqlimga moslashgan qishloq xo‘jaligi bo‘yicha kasbiy bilimlarga ega bo‘ladi.

Bundan tashqari, “Yosh yashil elchilar” tarmog‘i orqali 800 nafar qishloq yoshlarini mahalliy ekologik tashabbuslarni amalga oshirishda qo‘llab-quvvatlash loyihaning asosiy yo‘nalishlaridan biri bo‘ladi. Shuningdek, loyiha doirasida innovasion g‘oyalarni qo‘llab-quvvatlashga qaratilgan milliy iqlim tashabbuslari tanlovlari o‘tkaziladi.

Bunda eng yaxshi loyihalar xalqaro miqyosda e’tirof etilib, ularning mualliflari global ekologik harakatda ishtirok etish imkoniyatiga ega bo‘ladi. Loyiha O‘zbekistonning iqlim strategiyasi va “Atrof-muhitni muhofaza qilish va yashil iqtisodiyot yili” dasturini qo‘llab-quvvatlashi kerak.

Avvalroq iqlim o‘zgarishi O‘zbekiston madaniy meros obektlariga tahdid solayotgani haqida xabar berilgandi. Qadimgi binolarni ta’mirlash qimmatga tushadi, shuning uchun mutaxassislar qisman konservatsiya qilish bilan kifoyalanmoqda.