O‘zbekistonda dorilarni elektron retseptlar bo‘yicha tayinlash tartibi belgilandi
Shifokorlar bemorga buyurilgan va chakana savdoga chiqarilgan dori-darmonlarning harakatini kuzatib borishi mumkin bo‘ladi.
Hukumat sog‘liqni saqlash tizimini raqamlashtirish jarayonlarini yanada jadallashtirish chora-tadbirlarini tasdiqladi, deb yozadi Norma.
Hokimiyat elektron retsept asosida tibbiyot tashkilotlarida retsept bo‘yicha dori vositalarini tayinlash tartibi to‘g‘risidagi nizomni qabul qildi, unda quyidagilar nazarda tutilgan:
- retsept bo‘yicha beriladigan dori vositalarini bemorga elektron retseptlar asosida berish tartibi;
- yozib berilgan elektron retseptlarni ro‘yxatdan o‘tkazish;
- elektron retsept blankasini va undagi ma’lumotlarni “Elektron retsept” moduliga berish tartibi;
- tibbiyot tashkilotlarida retsept bo‘yicha beriladigan dori vositalarini elektron retseptlar asosida yozib berish tartibini buzganlik uchun javobgarlik.
2025-yil 10-dekabrdan boshlab Toshkent shahri va tajriba loyihasi amalga oshirilayotgan 15 ta tumandagi barcha tibbiyot tashkilotlarida bemorlarga dori vositalarini tayinlashda xalqaro patentlanmagan dori nomi (mavjud bo‘lsa) bo‘yicha elektron retsept yozib beriladi. Retsept bo‘yicha beriladigan dori vositalari O‘zbekistonda ro‘yxatdan o‘tkazilishi kerak.
Tibbiyot xodimlari bemor haqidagi ma’lumotlarni axborot tizimiga kiritadi va ular avtomatik ravishda “Elektron tibbiy karta” moduliga uzatiladi. Dori vositalari bemorga ushbu axborot tizimida elektron retseptni rasmiylashtirish orqali buyuriladi.
Retsept davolovchi shifokor tomonidan QR-kodni avtomatik ravishda qo‘yish orqali elektron tasdiqlash usullari yordamida tasdiqlanadi. Bemorlarga yozilgan dori vositalari haqidagi ma’lumotlar elektron retseptga bevosita shifokor tomonidan kiritiladi. Shifokorlarga elektron retsept asosida bemorga buyurilgan va chakana savdoga chiqarilgan dorilar harakatini kuzatib borish imkoniyati yaratilgan.
Izohlar