HET yozgi elektr ta’minotidagi uzilishlarni qishga tayyorgarlik bilan izohladi

HET axborot xizmati Toshkent aholisining yoz kelishi bilan tez-tez uchrayotgan elektr ta’minotidagi uzilishlarga oid shikoyatlariga javob berdi.

Elektr ta’minotidagi uzilishlarning asosiy sababi “elektr tarmoqlarini kuz-qish mavsumiga tayyorlash” ekani aytildi. Barchasi davlat dasturlari, qarorlar va farmonlarga muvofiq amalga oshirilmoqda.

“Shahar tumanlarida ishchilar xavfsizligini ta’minlash maqsadida rejali o‘chirishlar o‘tkazilmoqda. Bunday rejali o‘chirishlar haqida HET filiallari doimiy ravishda xabar berib bormoqda. Ta’kidlash joizki, tarmoqlarni yangilash va qish mavsumiga tayyorgarlik ko‘rish yozning jazirama kunlariga qaramay amalga oshirilayotgan dolzarb vazifalardan biri hisoblanadi”, — deyiladi xabarda.

Uzilishlarning ikkinchi darajali sababi sifatida issiq kunlarda tarmoqlarning haddan tashqari yuklanishi oqibatida yuzaga keladigan avariyalar ko‘rsatilgan.

“Bunday holatlarda korxonaning tuman va shahar elektr ta’minoti bo‘limlari avariyalarni qisqa muddatda bartaraf etishni ta’minlaydi. HET yuzaga kelgan noqulayliklar uchun iste’molchilardan uzr so‘raydi va aholining rejali uzilishlar haqidagi xabardorligini yanada oshirish choralari ko‘rilishini ma’lum qiladi”, — deyiladi xabarda.

Avvalroq o‘zbekistonliklar chiqindilardan elektr energiyasidan foydalanishi xabar qilingandi. Mamlakatning 7 ta hududida chiqindilarni elektr energiyasiga qayta ishlash loyihalari ishga tushiriladi.