Afg‘onistonda O‘zbekiston ishtirokida gaz konini o‘zlashtirish boshlandi
Balx viloyatida qurilish ishlarini boshlash marosimi bo‘lib o‘tdi.
Afg‘onistonda O‘zbekiston kompaniyasi ishtirokida gaz konini o‘zlashtirish ishlari boshlandi, deb xabar bermoqda Afg‘oniston bosh vazirining iqtisodiy masalalar bo‘yicha o‘rinbosari vazifasini bajaruvchi Abdul G‘ani Barodar Oxund matbuot xizmati.
Mamlakat shimolidagi Afg‘onistonning Juzjon va Faryob viloyatlaridagi To‘ti-Maydon konlarida gaz qazib olish rejalashtirilgan. TOLO News Afg‘oniston Tog‘-kon sanoati va neft vazirligiga tayanib xabar berishicha, loyihani amalga oshirish bo‘yicha 25 yil muddatga KAM Group xalqaro kompaniyasi va O‘zbekistonning Railcom kompaniyasi bilan shartnoma tuzilgan.
14-sentyabr kuni Balx viloyatida qurilishni boshlash marosimi bo‘lib o‘tdi. Unda Abdul G‘ani Barodar, O‘zbekiston energetika vazirining birinchi o‘rinbosari Baxtiyor Mamatkarimov, “O‘zbekneftgaz” kompaniyasi raisi Bahodirjon Sidiqov, O‘zbekiston prezidentining Afg‘oniston bo‘yicha maxsus vakili Ismatulla Irgashev ishtirok etdi.
Ushbu loyiha tufayli mamlakatning gaz va elektr energiyasi importiga qaramligi kamayadi, chet el valyutasining chiqib ketishi kamayadi va vaqt o‘tishi bilan gazni xorijga eksport qilish uchun asos yaratiladi, — dedi Barodar.
Prezidentning maxsus vakili Ismatulla Irgashev O‘zbekiston mamlakatdagi yirik iqtisodiy loyihalarni qo‘llab-quvvatlashga sodiqligini tasdiqladi.
Loyiha Afg‘oniston va O‘zbekiston o‘rtasidagi iqtisodiy sheriklik modeliga aylanishi va munosabatlarimizni tarixiy qo‘shnichilik darajasidan zamonaviy iqtisodiy hamkorlikning yangi bosqichiga ko‘tarishi mumkin, — dedi u.
Ishlar xalqaro standartlar asosida olib boriladi. Afg‘oniston Tog‘-kon sanoati va neft vazirligi ma’lumotlariga ko‘ra, To‘ti-Maydon 7500 kv km maydonni egallaydi, u yerda allaqachon 30 ga yaqin quduq qazilgan va katta tabiiy gaz zaxiralariga ega.
Eslatib o‘tamiz, avvalroq Afg‘oniston yana vertolyotlarni qaytarishga chaqirgandi. Amir Xon Muttaqiy diplomatlar va xalqaro tashkilotlar bilan uchrashuvda Afg‘onistonga vertolyotlarni qaytarishni talab qildi va jahon hamjamiyatini bank sanksiyalarini bekor qilishga chaqirdi.
Izohlar