Toshkent viloyatida bir erkak bilan turmush qurgan ikki opa-singil turli sharoitlarda vafot etdi

Toshkent viloyatida mast holda xotinini kaltaklab, kasalxonada vafot etgan erkakka hukm o‘qildi, deb xabar bermoqda NeMolchi.uz loyihasi.

Ma’lumotlarga ko‘ra, hodisa 2024-yil 16-avgustdan 17-avgustga o‘tar kechasi sodir bo‘lgan. 37 yoshli erkak mast holda uyiga qaytib kelgan va rashk tufayli uxlab yotgan xotinini uyg‘otib, u bilan janjallashib, ayolning qorniga tepgan. Voqeaga erkakning ota-onasi va ularning ikki nafar voyaga yetmagan farzandi guvoh bo‘lgan.

Jabrlanuvchi o‘zini yomon his qilgach, shifoxonaga olib borilgan va ikki hafta o‘tgach, ayol shifokorlarning yordamiga qaramay vafot etgan. Ayolning ota-onasining aytishicha, oilada tez-tez janjallar bo‘lib turgan va erkak ko‘pincha turmush o‘rtog‘iga qo‘l ko‘targan. Shuningdek, sudlanuvchi va uning onasi kaltaklash faktini yashirishga urinib, marhumani kaltaklashlarga zinadan yiqilish sabab bo‘lganini aytishga ko‘ndirgan.

Ammo ish huquq-tartibot idoralari xodimlari qo‘liga tushgan. Sud-tibbiy ekspertizasi ayolda ko‘plab ichki a’zolar shikastlanishi va hayotlik davrida yuzaga kelgan surunkali kasalliklarni aniqladi. Natijada, Jinoyat ishlari bo‘yicha Ohangaron tuman sudi 2025-yil 21-fevral kuni erkakni Jinoyat kodeksining 126-1-moddasi 8-qismi «g» bandi (jabrlanuvchining o‘limiga sabab bo‘lgan oilaviy (maishiy) zo‘ravonlik) bilan aybdor deb topib, unga nisbatan 10 yil muddatga ozodlikdan mahrum qilish jazosi tayinlagan.

Erkak o‘z hukmiga rozi bo‘lmagan va ish 2025-yil 1-iyulda Toshkent viloyati sudining apellyatsiya instansiyasida ko‘rib chiqilgan. Aybdor suddan birinchi instansiya sudining hukmini bekor qilishni va o‘zini xotinining o‘limida aybsiz deb topishni so‘ragan. Apellyatsiya instansiyasi sudi jinoyat ishi materiallarini o‘rganib chiqib, o‘tkazilgan ekspertizalar natijalariga, shuningdek, marhumaning tibbiy kartasiga asoslanib, olingan tan jarohatlari jabrlanuvchining o‘limi bilan bevosita bog‘liq emas va ayolning o‘limi yurak xuruji natijasida sodir bo‘lgan, degan xulosaga keldi.

Ishni apellyatsiya instansiyasi sudida ko‘rish yakuniga ko‘ra, erkakning jinoyati JKning 126-1-moddasi 6-qismi (jismoniy zarar yetkazishga olib kelgan oilaviy (maishiy) zo‘ravonlik) bilan kvalifikatsiya qilinib, unga 6 yil 5 oy muddatga ozodlikdan mahrum qilish jazosi tayinlandi.

Biroq voqea shu bilan ham tugamagan, chunki marhum qizning ota-onasi erkak avvalroq uning singlisiga uylanganini, u to‘ydan biroz vaqt o‘tgach, hammomda cho‘milayotganda bo‘g‘ilib vafot etganini aytgan. Ma’lum bo‘lishicha, biroz vaqt o‘tgach, erkak yana sovchilikka kelgan va bu vaqtga kelib birinchi eridan ajrashgan katta opasiga uylangan.

Shuningdek, ota-onaning aytishicha, katta qizi shifoxonada o‘ziga kelgach, navbatdagi kaltaklash paytida eri hammom eshigini qulflab, birinchi xotini bo‘g‘ilguncha kutib turganini aytgan. Uning aytishicha, erkak: “Uni o‘ldirdim, seni ham o‘ldiraman!” degan.

Ushbu ish bo‘yicha sud hukmi o‘qilgandan so‘ng, ko‘plab savollar tug‘iladi. Nega u birinchi xotinining o‘limi uchun javob bermadi, uni hammomga qamab qo‘yib, bo‘g‘ilib o‘lishini sovuqqonlik bilan kutdi? Uning birinchi xotinining o‘limini tan olishi bo‘yicha tekshiruv o‘tkazilganmi? U bu jinoyat uchun javob beradimi?

Qamoqxonada o‘tkazilgan 6,5 yil bunday shafqatsiz odamning xulq-atvorini o‘zgartira oladimi? — deya savol bilan yuzlandi NeMolci.uz loyihasi.

Avvalroq Termizda erkak xotinini ayovsiz kaltaklagani haqida xabar berilgandi. Ayol zo‘ravonlikka chiday olmay, yosh bolasi bilan uydan deyarli hech narsasiz qochib ketgan.