Surxondaryoda 28 yoshli ayol chaqalog‘ini yo‘qotib qo‘ydi Surxondaryo viloyatida 28 yoshli ayol chaqalog‘ini yo‘qotib qo‘ydi, u tug‘ruqxona xodimlarini beparvolikda ayblamoqda, deb yozadi Batafsil.
Hodisa Sho‘rchi tumanida sodir bo‘lgan. Jabrlanuvchining singlisining so‘zlariga ko‘ra, 4-noyabr kuni shifoxonaga olib kelingan ayolning ahvoli bir kun ichida yomonlashgan. Biroq tibbiyot xodimlari kerakli yordamni ko‘rsatishmagan va bola ona qornida vafot etgan. Murojaatchining so‘zlariga ko‘ra, tuman tug‘ruqxonasida avval ham shunday fojialar sodir bo‘lgan.
Ayolning ta’kidlashicha, o‘sha kuni o‘tkazilgan ultratovush tekshiruvi, shuningdek, butun homiladorlik davridagi skrininglar va hujjatlar homila to‘liq sog‘lom, to‘g‘ri joylashgan va tug‘ruqqa tayyor ekanligini tasdiqlagan. 5-noyabr kuni tushdan keyin ayolning ahvoli keskin yomonlashdi, kuchli og‘riqlar boshlandi.
Qarindoshlarining murojaatlariga qaramay, shifokorlar uning ahvoliga e’tibor bermagan va bemorni tekshirmagan. Qayd etilishicha, shifokorlarning befarqligi tufayli 2-3 soat ichida sog‘lom homila suyuqliksiz qolib, bachadonda nobud bo‘lgan. Keyinchalik onaning hayotini saqlab qolish uchun shifokorlar kesarcha kesish operatsiyasini o‘tkazishga rozilik olishdi.
Murojaatchining so‘zlariga ko‘ra, agar kesarcha kesish o‘z vaqtida amalga oshirilganida, bolani saqlab qolish mumkin edi. Uning fikricha, shifoxona xodimlari mas’uliyatsizlikka yo‘l qo‘ygan va kerakli ma’lumotlarni berishdan bosh tortgan. Xususan, tug‘ruqxona xodimlari qarindoshlariga homiladorlik va tug‘ruq bo‘yicha tibbiy hujjatlarning to‘liq paketini berishdan bosh tortgan.
Ayol faqat ultratovush tekshiruvining so‘nggi natijalarini suratga olishga muvaffaq bo‘ldi. Homilador ayolning ahvoli og‘irlashgan paytda UTT o‘tkazgan shifokor ham uning singlisiga hech qanday tushuntirish bermagan. Tibbiy ekspertiza chaqaloqni dafn etish uchun ruxsatnoma berish bilan cheklandi.
Prokuraturaga jabrlanuvchining murojaati kelib tushgan, viloyat Sog‘liqni saqlash boshqarmasi holatga aloqador tug‘ruqxona xodimlariga nisbatan tekshiruv boshlanganini ma’lum qilgan.
Eslatib o‘tamiz, Samarqandda hamshira yangi tug‘ilgan chaqaloqni o‘g‘irlab, 6 mln so‘mga sotgandi. Huquqbuzar ruhiy nosog‘lom sifatida ro‘yxatda turgan ayolning chaqalog‘ini o‘g‘irlab ketgan.
