Rossiyada ikki o‘zbekistonlik qurilishda devor qulashi oqibatida halok bo‘ldi
Migrantlar rasmiy ro‘yxatdan o‘tmasdan ishlagan.
Rossiyada ikki o‘zbekistonlik qurilishda devorlardan biri qulashi oqibatida halok bo‘ldi, deb xabar bermoqda 47 news Leningrad viloyati SKga tayanib.
Ma’lumotlarga ko‘ra, voqea Leningrad viloyatining Vsevolojsk tumanidagi Vartemyagi qishlog‘ining Yujniy mikrorayonida uy qurilishi paytida sodir bo‘lgan. Huquq-tartibot idoralari xodimlari hududda 43 va 61 yoshli ikki erkakning jasadini topishdi.
Dastlabki ma’lumotlarga ko‘ra, ikkala muhojir ham Rossiyaga xorijdan kelgan va saytda norasmiy ravishda, tegishli shartnoma tuzmasdan ishlagan. Nashr ma’lumotlariga ko‘ra, halok bo‘lganlar O‘zbekiston fuqarolari bo‘lib, ular migratsiya ro‘yxatida turmagan.
Yana bir 37 yoshli hamyurtimiz og‘ir tan jarohatlari bilan shifoxonaga yetkazilgan. Hududda paydo bo‘lgan ishchi huquq-tartibot idoralariga ish yer egasi bilan og‘zaki kelishuv asosida olib borilganini aytdi.
“Dastlabki ma’lumotlarga ko‘ra, qurilish paytida ikkinchi qavatning beton yopma plitasi qulab tushgan. Qurilish buyurtmachisi — prorabning tanishi, hozir xorijda”, — deyiladi xabarda.
Huquq-tartibot idoralari ushbu holat yuzasidan ehtiyotsizlik orqasida odam o‘ldirish to‘g‘risida jinoyat ishi qo‘zg‘atgan. Zarur ekspertizalar tayinlanib, tergov harakatlari olib borilmoqda.
Avvalroq Rossiyadagi qurilishda o‘zbekistonlik balandlikdan yiqilib, vafot etgani haqida xabar berilgandi. Dastlabki ma’lumotlarga ko‘ra, migrantda sug‘urta aloqasi bo‘lmagan.
Izohlar