Janubiy Koreya O‘zbekistonga xalqaro standartlar bo‘yicha shifokorlar tayyorlashda yordam beradi
Tomonlar har yili O‘zbekistondan 20 nafar mutaxassisni bepul o‘qitishga kelishib oldi.
O‘zbekiston va Janubiy Koreya o‘rtasida robotlashtirilgan jarrohlik sohasida hamkorlik qilish, shuningdek, har yili O‘zbekistondan 20 nafar mutaxassisni xalqaro standartlar bo‘yicha bepul o‘qitish to‘g‘risida kelishuvga erishildi, deb xabar beradi Sog‘liqni saqlash vazirligi matbuot xizmati.
Ma’lumotlarga ko‘ra, mamlakat Sog‘liqni saqlash vazirligi delegatsiyasi Janubiy Koreyada bo‘lib, mahalliy tibbiyot va ta’lim muassasalari faoliyati bilan tanishgan. Xususan, tashrif doirasida mamlakatimiz vakillari zamonaviy laboratoriyalar, telemeditsina markazi, 3D-trening zallari va virtual simulyatorlar bilan jihozlangan Seul milliy universiteti Bundang klinikasida bo‘ldi.
Bundan tashqari, delegatsiya Kenju universitetida qo‘shma ta’lim dasturlari, jumladan, hamshiralarni tayyorlash istiqbollari muhokama qilingan xalqaro konferensiyada ishtirok etdi. Shuningdek, O‘zbekiston vakillari Changvon davlat universiteti, Asantek ilmiy guruhi rahbariyati bilan uchrashib, Inje universiteti klinikasi, Yonsey universitetining biotexnologiya va nanotexnologiya fakulteti hamda ekspress-diagnostika qurilmalarini ishlab chiqaruvchi SD-biosensor kompaniyasi faoliyatini o‘rgandi.
Uchrashuv yakunida tomonlar robotlashtirilgan jarrohlik, onkologiya, raqamlashtirish, teletibbiyot, shuningdek, shifokorlar, hamshiralar va tibbiy texnika muhandislarini tayyorlash sohasida hamkorlik qilishga kelishib oldi. Bundan tashqari, Koreya Xalqaro sog‘liqni saqlash jamg‘armasi prezidenti bilan muloqot chog‘ida har yili O‘zbekistondan 20 nafar mutaxassisni xalqaro standartlar bo‘yicha bepul o‘qitish bo‘yicha kelishuvga erishildi.
Shuningdek, Koreya tomoni 2026-2028-yillarga mo‘ljallangan sog‘liqni saqlash sohasidagi hamkorlik dasturini kengaytirishga tayyorligini bildirdi. Bu O‘zbekistonda ta’lim, tibbiyot va eng yangi texnologiyalarni joriy etish sohasidagi hamkorlikni mustahkamlashga yordam berishi rejalashtirilgan.
Avvalroq O‘zbekiston Malayziya bilan hamkorlik to‘g‘risidagi bitimlar to‘plamini imzolagani haqida xabar berilgandi. Mamlakatlar ta’lim, tibbiyot va “aqlli shaharlar”ni rivojlantirishda bir-biriga yordam beradi.
Izohlar