TIV o‘zbekistonliklarga qaysi davlatlarga vizasiz uchish mumkinligini eslatdi
Idora o‘nlab davlatlar bilan xorijga chiqishni yanada soddalashtirish bo‘yicha muzokaralar olib bormoqda.
O‘zbekiston fuqarolari 40 ga yaqin davlatga vizasiz tashrif buyurishlari mumkin. O‘zbekiston Tashqi ishlar vazirligi fuqarolarning xorijda erkin va qulay harakatlanishini ta’minlash, shuningdek, viza talablarini bekor qilish yoki soddalashtirishni o‘z faoliyatining ustuvor yo‘nalishlaridan biri deb hisoblashini ma’lum qildi.
Vazirlikning qayd etishicha, ushbu maqsadga erishish uchun xorijiy hamkorlar bilan doimiy muzokaralar olib borilmoqda va bu aniq natijalar bermoqda.
TIV ma’lumotlariga ko‘ra, bugungi kunda O‘zbekiston fuqarolari 40 ga yaqin davlatga vizasiz, yana 42 ta davlatga esa soddalashtirilgan tartibda kirishlari mumkin.
2023-2025-yillarda Xitoy, BAA, Tailand, Ummon va Eron kabi o‘nga yaqin davlat bilan vizasiz rejim joriy etildi. Bundan tashqari, Saudiya Arabistoni, Qatar va Vetnam kabi davlatlar O‘zbekiston fuqarolari uchun viza talablarini soddalashtirdi.
Ayni paytda o‘nlab davlatlar bilan xorijga chiqishni yanada soddalashtirish bo‘yicha faol muzokaralar davom etmoqda. Tashqi ishlar vazirligi mamlakat fuqarolari uchun xalqaro maydonda imkoniyatlarni izchil kengaytirish niyatida ekanini ta’kidlamoqda.
O‘zbekiston uchun vizasiz rejim o‘rnatilgan davlatlar: Antigua va Barbuda, Armaniston, Barbados, Belarus, Birlashgan Arab Amirliklari, Dominika, Eron, Falastin, Filippin, Gaiti, Gambiya, Gruziya, Keniya, Kot-d’Ivuar, Malayziya, Mikroneziya Federativ Shtatlari, Mo‘g‘uliston, Moldova, Namibiya, Ozarbayjon, Qirg‘iziston, Qozog‘iston, Rossiya, Sent-Vinsent va Grenadin orollari, Seyshel orollari, Shri-Lanka, Surinam, Tojikiston, Turkiya, Ukraina, Qatar.
Shuni ta’kidlash kerakki, viza rejimlari o‘zgarishi mumkin, shuning uchun sayohatdan oldin Tashqi ishlar vazirligida, aviatashuvchida yoki IATA Timatic tizimida kirishning dolzarb qoidalariga aniqlik kiritish tavsiya etiladi.
Izohlar