O‘zbekistonliklarga samolyotda o‘zini yomon his qilmaslikning yo‘llari tushuntirildi

2025-yil boshidan beri samolyotda 5 ta o‘lim holati qayd etilgan bo‘lib, ularning barchasi belgilangan manzilga yetib borgunga qadar bortda sodir bo‘lgan, deb xabar beradi Uzbekistan Airports matbuot xizmati.

Kompaniya ma’lumotlariga ko‘ra, o‘tkir yoki surunkali kasalliklarda parvozlar sog‘liq uchun potensial xavfli bo‘lishi mumkin. Bosimning o‘zgarishi, harakatning cheklanganligi va parvozning boshqa xususiyatlari yo‘lovchining ahvolini og‘irlashtirishi mumkin. Bunday hollarda yo‘lovchini tibbiy ko‘rsatmalar bo‘yicha reysdan chetlatish talab qilinishi mumkin.

“Favqulodda vaziyatlarning aksariyati parvoz paytida sodir bo‘ladi, shuning uchun yo‘lovchilar mumkin bo‘lgan xavflarni oldindan bilishlari va qarshi ko‘rsatmalarni hisobga olishlari kerak. Shunday qilib, 2024-yilda 14 ta o‘lim holati qayd etilgan, ulardan 11 tasi samolyot bortida va 3 tasi uchib kelish zalida. 2025-yil boshidan buyon 5 ta o‘lim holati qayd etilgan va ularning barchasi belgilangan manzilga yetib borgunga qadar bortda sodir bo‘lgan”, — deyiladi xabarda.

Parvozlarga asosiy aks ko‘rsatmalar quyidagilardan iborat:

• yaqinda o‘tkazilgan jarrohlik operatsiyalari;
• o‘tkir yurak-qon tomir kasalliklari (masalan, infarkt, beqaror stenokardiya);
• insult va boshqa o‘tkir nevrologik holatlar;
• pnevmotoraks, og‘ir bronxial astma, pnevmoniya;
• tromboemboliya, faol qon ketish, og‘ir anemiya;
• quloq, burun bo‘shliqlari va ko‘zning barotravmalari;
• homiladorlikning kechki muddatlari, ayniqsa asoratlar bilan.

Tibbiy ko‘rsatmalar bo‘yicha talablar turli aviakompaniyalarda farq qilishi mumkin. Ba’zi hollarda tashuvchi tibbiy ma’lumotnomani talab qilish huquqiga ega — masalan, beqaror tashxislar, kislorod yordami zarurati, tibbiy kuzatuv yoki homiladorlikning kechki muddatlarida.

Eslatib o‘tamiz, o‘zbekistonliklarga hayvonlarni samolyotda qanday tashish kerakligi tushuntirilgandi. Ko‘zi ojiz va kar yo‘lovchilar uchun yetakchi itlar bepul uchishi mumkin.