O‘zbekistonda qurilish oynasi uchun utilizatsiya yig‘imi joriy etiladi
Shu bilan birga, material sifatini yaxshilash va ishlab chiqarish hajmini oshirish rejalashtirilgan.
O‘zbekistonda qurilish oynasi sifatini oshirish, shuningdek, uning eksporti hajmini oshirish rejalashtirilmoqda, deb xabar beradi Qonunchilik palatasi matbuot xizmati.
Ma’lum qilinishicha, deputatlar qurilish materiallari sohasida texnik jihatdan tartibga solishni yanada takomillashtirish to‘g‘risidagi qonun loyihasini birinchi o‘qishda ko‘rib chiqqan. Xususan, qonun loyihasi chiqindilarning fuqarolar hayoti va sog‘lig‘iga hamda atrof-muhitga zararli ta’sirining oldini olishga, shuningdek, chiqindilar hosil bo‘lishini kamaytirish va ulardan oqilona foydalanishni ta’minlashga yordam berishi kerak.
Mamlakatda qurilish oynasini utilizatsiya qilish yig‘imi joriy etilishi rejalashtirilgan bo‘lib, bu ulardan foydalanish natijasida hosil bo‘ladigan chiqindilarni utilizatsiya qilish va qayta ishlash xarajatlarini qoplashga yordam beradi. Shuningdek, qonun loyihasida qurilish oynasi sifatini yaxshilash va mahalliy ishlab chiqarilgan oyna eksporti hajmini oshirish ko‘zda tutilgan.
Hujjat kuchga kirgunga qadar Qonunchilik palatasida yana ikkita o‘qishdan o‘tishi, Senat tomonidan ma’qullanishi va prezident tomonidan imzolanishi kerak.
Avvalroq O‘zbekiston xavfli sanoat chiqindilaridan yoqilg‘i ishlab chiqarishni boshlashi haqida xabar berilgandi. Mamlakat uni amalga oshirishga yordam beradigan ikkita xorijiy kompaniya bilan shartnoma imzolagan.
Izohlar