O‘zbekiston Dohadagi harbiy tajovuzga yana qarshi chiqdi

Tashqi ishlar vaziri Baxtiyor Saidov Doha shahrida bo‘lib o‘tayotgan favqulodda arab-islom sammiti ishtirokchilariga Shavkat Mirziyoyevning murojaatini topshirdi, deb xabar bermoqda vazirlik matbuot xizmati.

Vazirning so‘zlariga ko‘ra, prezident bayonotida Qatar xalqi va barcha musulmon davlatlari bilan mustahkam birdamlik tasdiqlangan. Shuningdek, Yaqin Sharqdagi tinchlik va xavfsizlikka tahdid solayotgan so‘nggi harbiy tajovuzlar keskin qoralanmoqda. O‘zbekiston o‘zining aniq pozitsiyasini yana bir bor tasdiqladi:

• barcha mojarolar tinch yo‘l va diplomatiya yo‘li bilan hal etilishi lozim;
• xalqaro hamjamiyat zo‘ravonlikni to‘xtatish va uning yanada avj olishiga yo‘l qo‘ymaslik uchun shoshilinch choralar ko‘rishi shart;
• BMT rezolyutsiyalariga muvofiq Falastin xalqining mustaqil davlat tuzishga bo‘lgan qonuniy huquqi hurmat qilinishi kerak;
• O‘zbekiston jabrlanganlarga gumanitar yordam ko‘rsatishga tayyor, bu mamlakatda bir guruh Falastin fuqarolarini qabul qilish va qo‘llab-quvvatlashda namoyon bo‘ldi.

Eslatib o‘tamiz, Shavkat Mirziyoyev Qatar amiri bilan qo‘ng‘iroqlashib, Isroilning Dohaga bergan zarbasini qoralagandi. Prezident O‘zbekiston xalqaro munosabatlarda kuch ishlatishning har qanday shakliga va Yaqin Sharqdagi vaziyatning yanada keskinlashishiga olib keladigan qadamlarga qarshi ekanini eslatdi.