Raqobat qo‘mitasi kredit karta egalarini himoya qilish uchun Markaziy bankka so‘rov yubordi, deb xabar bermoqda vazirlik matbuot xizmati.
Ma’lum bo‘lishicha, ba’zi banklar kredit kartalaridan to‘lovlarni (masalan, kommunal xizmatlar, ta’lim, tibbiy xizmatlar, sug‘urta va soliqlar uchun) naqd pul yechib olishga tenglashtiradi. Ular buning uchun yuqori foizlar va komissiyalar olishdi. Raqobat qo‘mitasi ushbu masala yuzasidan Markaziy bankka so‘rov yubordi.
Idora regulyatordan quyidagilarni talab qildi:
- davlat va xususiy banklar faoliyatini o‘rganish hamda kredit kartochkalari bo‘yicha foizlar masalalarini qayta ko‘rib chiqish;
- iste’molchilarning manfaatlarini hisobga olgan holda chora-tadbirlarni kelishish, shuningdek, asossiz olingan vositachilik haqini qaytarish choralarini ko‘rish.
Avvalroq Markaziy bank iqtisodiy me’yorlarni buzgan 11 ta bankni jarimaga tortgani haqida xabar berilgandi. Shuningdek, Bank nazorati qo‘mitasi tomonidan kredit tashkilotlarining moliyaviy holati bilan bog‘liq 14 ta masala ko‘rib chiqildi.
