O‘zbekistonning korrupsiyani qabul qilish reytingidagi o‘rni ma’lum qilindi
Mamlakat Rossiyadan o‘zib keta oldi, ammo Qozog‘istonga yetolmadi.
Transparency International ma’lumotlariga ko‘ra, O‘zbekiston yillik Korrupsiyani qabul qilish indeksida 126-o‘rinni egalladi.
Ma’lumotlarga ko‘ra, ushbu indeks mamlakat aholisi tomonidan davlat sektoridagi korrupsiya darajasini aks ettiradi. Bunda baholar 13 ta tadqiqot va ekspert so‘rovlari, shu jumladan Jahon banki va Jahon iqtisodiy forumining uchta manbasi asosida shakllantiriladi.
2024-yil yakunlariga ko‘ra, O‘zbekiston ehtimoliy 100 balldan 28 ball to‘plashga muvaffaq bo‘ldi, bu esa, tahlilchilarning hisob-kitoblariga ko‘ra, yil davomida davlat xizmatlaridan foydalanuvchilarning qariyb 13 foizi pora berganini tan olganini anglatadi. Angola, Ekvador, Keniya, Shri-Lanka va Togoda ham xuddi shunday natija qayd etildi.
Shu bilan birga, reytingning yetakchi mamlakatlari Daniya, Finlyandiya va Singapur bo‘lib, ularda fuqarolarning atigi 1 foizi korrupsiyaga duch kelgan. Reytingning so‘nggi pog‘onalarini Janubiy Sudan, Somali va Venesuela egalladi. Markaziy Osiyo davlatlari orasida Qozog‘iston 88-o‘rinni egallab, reyting yetakchisi bo‘ldi. Eng past natijalar Turkmanistonda qayd etilgan — 167 o‘rin va Tojikistonda — 164 o‘rin. Rossiya esa 153-pog‘onadan joy olgan.
Avval xabar berilganidek, O‘zbekiston davlat organlari korrupsiyaga nisbatan murosasizlikka o‘rgatiladi. Prezident davlat ulushi 50 foiz bo‘lgan idoralarda korrupsiyaga qarshi kurashish bo‘limlarini kuchaytirish to‘g‘risida qaror qabul qilgan.
Izohlar