Prezident “Tibbiyot va farmatsevtika xodimlarini qo‘llab-quvvatlash choralari to‘g‘risidagi qaror”ni imzoladi

O‘zbekistonda davlat tibbiyot muassasalari xodimlarining ijtimoiy himoyasini kuchaytirish chora-tadbirlari tasdiqlandi, deyiladi prezident qarorida.

2026-yildan boshlab mamlakatimizda Tibbiyot xodimlari kuni munosabati bilan Tibbiyot xodimlarini moddiy rag‘batlantirish jamg‘armasi hisobidan har yili MHEKMdan — 1,2 mln so‘mdan kam bo‘lmagan miqdorda rag‘batlantirish joriy etiladi. Shuningdek, “eng yaxshi rahbar”, “eng yaxshi poliklinika”, “eng yaxshi shifokor”, “eng yaxshi o‘rta tibbiyot xodimi” nominatsiyalari bo‘yicha respublika tanlovi tashkil etiladi.

G‘oliblarga bir martalik mukofotlar beriladi: muassasalar uchun — 500 mln so‘m, shifokorlar va rahbarlar uchun — 30 mln so‘m. Alohida g‘oliblar “Xizmat ko‘rsatgan sog‘liqni saqlash xodimi” unvoniga taqdim etiladi. 2026-yil 1-apreldan davlat tibbiyot muassasalari dam olish va bayram kunlari navbatchilik bilan besh kunlik ish haftasiga o‘tadi.

2026-yil 1-yanvardan boshlab quyidagi qo‘shimcha rag‘batlantirish choralari joriy etiladi:

• yangi davolash usullarini joriy etgan va natijasi tasdiqlangan shifokorlarga BHMning 50 baravari miqdorida;
• 15 yildan ortiq ish stajiga ega bo‘lgan tibbiyot xodimlarining farzandlariga o‘qish xarajatlarining 30%igacha (BHMning 15 baravaridan ko‘p bo‘lmagan miqdorda) kompensatsiya qilinadi;
• impakt-faktorli jurnallarda maqolalar chop etish xarajatlarini to‘liq qoplaydi;
• har yili 500 nafar tibbiyot xodimi uchun boshlang‘ich ipoteka to‘lovining 25 foizi davlat tomonidan qoplab beriladi;
• milliy akkreditatsiyadan o‘tgan xodimlarning ish haqiga 10% miqdorida ustama belgilanadi.
• Shuningdek, 3 yildan ortiq ish stajiga ega shifokorlar yiliga bir marta bepul yuqori texnologik tibbiy yordam olish, 15 yildan ortiq ish stajiga ega shifokorlar esa sanatoriylarga bepul yo‘llanma olish huquqiga ega bo‘ladi. Ular uchun davlat xizmatlari uchun to‘lovlar miqdori 2 baravarga kamaytiriladi.

Eslatib o‘tamiz, prezident tibbiyotni odamlarga yaqinlashtirish bo‘yicha topshiriq bergan edi. Shavkat Mirziyoyevga sog‘liqni saqlash sohasidagi islohotlar taqdim etildi.