Birlashgan Millatlar Tashkiloti Bosh Assambleyasi raisi Annalena Berbokning hisobotiga ko‘ra, dunyoda har uchinchi ayol hech bo‘lmaganda bir marta jinsiy zo‘ravonlikka duchor bo‘ladi.
Ma’lumotlarga ko‘ra, BMT Bosh Assambleyasi raisi Xotin-qizlar huquqlari bo‘yicha Pekin deklaratsiyasining 30 yilligiga bag‘ishlangan uchrashuvda ma’lumotlar bilan o‘rtoqlashgan. Qayd etilishicha, 2024-yilda BMT tomonidan 4,5 mingta jinsiy zo‘ravonlik holatlari qayd etilgan bo‘lib, ularning aksariyati ayollar va qizlar qurboniga aylangan.
Annalena Berbokning ta’kidlashicha, bunday ma’lumotlar samarali himoya va profilaktika choralari zarurligini ko‘rsatadi, aks holda zo‘ravonlik oqibatlari jiddiy bo‘lib qoladi va xalqaro hamjamiyatning zudlik bilan e’tiborini talab qiladi. Shuningdek, jamiyatda hali ham mavjud bo‘lgan stereotiplar va kamsitishlar muammolarni hal qilishga katta to‘sqinlik qilayotgani ta’kidlandi.
Yuqori malakali ayol rahbarlarni “xilma-xillik ramzi” deb atashadi, jahon yetakchi ayolini esa ijtimoiy tarmoqlarda nutqi uchun emas, balki baland poshnali noto‘g‘ri poyabzal kiygani uchun tanqid qilishadi. Bularning barchasi ro‘y berar ekan, biz hali qancha uzoq yo‘lni bosib o‘tishimiz kerakligini anglaymiz, — dedi BMT Bosh Assambleyasi raisi.
Shuningdek, dunyoda ayollar erkaklar bilan to‘liq teng bo‘lgan birorta mamlakat yo‘qligi ta’kidlandi. Iqtisodiy sohada Annalena Berbok, shuningdek, hozirgi sur’atlarda erkaklar va ayollar o‘rtasida iqtisodiy tenglikka erishish yana 123 yil davom etishi mumkinligini, gender tafovutini bartaraf etish esa jahon yalpi ichki mahsulotini 7 trillion dollarga oshirishi mumkinligini ta’kidladi.
Bosh kotib Antoniu Guterrish jahon hamjamiyatini Pekin deklaratsiyasini amalga oshirishni tezlashtirishga chaqirdi, “BMT-ayollar” tuzilmasi ijrochi direktori Sima Baxus ham qator mamlakatlarda ayollar huquqlarini himoya qilish mexanizmlari zaiflashganiga qaramay, global miqyosda kelishilgan va qat’iy harakatlar bilan kelajakni hali ham o‘zgartirish mumkinligini qo‘shimcha qildi.
Avvalroq O‘zbekistonda reabilitatsiya markazlari zo‘ravonlik qurbonlarini yarim yilga boshpana bilan ta’minlashi mumkinligi xabar qilingandi. Shuningdek, markaz xodimlari jabrlanganlarga aliment yoki zarur ijtimoiy nafaqalarni rasmiylashtirishda yordam berishi mumkin.
