Ямагата университети мутахассислари ўзбекистонлик тадбиркорларни ўқитади

Ўқув курсларида тадбиркорлар бизнес кўникмаларини ривожлантириш, бизнес-режа ишлаб чиқиш, лойиҳаларни молиялаштириш манбаларини топиш каби йўналишларда ўқитилади.

12-18 апрель кунлари Япониянинг Ямагата университети делегацияси ҳамда Кичик бизнесни ривожлантириш жамғармаси ходимлари Қорақалпоғистон Республикаси, Хоразм ва Бухоро вилоятларида бўлиб, маҳаллий тадбиркорлар иштирокида ўқув семинари ўтказишди.

Шунингдек, «Кичик бизнесни узлуксиз қўллаб-қувватлаш» комплекс дастури иштирокчиси бўлган, ўқув курсларини тугатиб махсус сертификат асосида имтиёзли банк хизматларидан фойдаланаётган тадбиркорлар фаолияти билан бевосита корхоналарнинг ўзида танишув ташкил этилди.

Тадбиркорлик фаолиятини кўздан кечирган япон олимлари бизнесни тўғри ташкил этиш ва ривожлантириш юзасидан тавсиялар берди.

Шундан кейин Тошкентда, Ахборот ва оммавий коммуникациялар агентлигида бу ташриф якунларига бағишланган матбуот анжумани бўлиб ўтди. Унда Ямагата университетининг тадбиркорликка ўқитиш илмий-инновацион маркази директори, NЕC ва Lenovo компанияларининг собиқ вице-президенти профессор Тадаши Онодера лойиҳа ҳақида сўзлаб, вилоятларга ташрифдан олган таассуротлари билан ўртоқлашди.

NOVA24 YouTubeʼда. Обуна бўлинг
Асосий янгиликлар ва қизиқарли видеолар