30 Iyul 2024, 09:56 •Oʻzbekiston

O‘zbekistonda aholi sonining o‘sishi sekinlashmoqda

Statistika agentigi O‘zbekistonda aholi sonining o‘sishi sekinlashganini ma’lum qildi.

2024 yilning 1 iyul holatiga O‘zbekiston aholisi 37 mln 134,2 ming kishini tashkil etib, o‘tgan yilning mos davriga nisbatan 2,1 foiz yoki 761,8 ming kishiga ko‘paygan. Bu haqda Statistika agentigi ma’lum qildi.

Joriy yildan boshlab aholi sonining o‘sishi sekinlasha boshlagan. Xususan, 2023 yilning mos davrida aholining o‘sish 2,2 foiz yoki 768,8 ming nafar tashkil etgan.

2024 yil yanvar-iyun oylarida O‘zbekistonda qayd etilgan nikohlar soni 97 ming 400 tani tashkil etib, o‘tgan yilning mos davriga nisbatan 1265 taga kamaygan. 2022 yilning mos davri bilan taqqoslanganda esa 11 ming 534 taga kamaygan.

Hisobot davrida qayd etilgan nikohlarda ayollarning o‘rtacha yoshi 22,9 yoshni, erkaklarning o‘rtacha yoshi esa 27,8 yoshni tashkil etgan. Qayd etilgan nikohlarning eng katta ulushi 25 yoshgacha bo‘lgan ayollarga to‘g‘ri kelib, jami nikohlarning 76,2 foizini tashkil etgan.

Joriy yilning birinchi yarim yilligida qayd etilgan nikohdan ajralishlar soni 22 ming 467 tani tashkil etib, 2023 yilning mos davriga nisbatan 2955 taga yoki 11,6 foizga kamaygan. Shunday bo‘lsa-da, bu ko‘rsatkich 2021 yilga nisbatan 3 mingtaga ko‘p.

2024 yil yanvar-iyun oylarida farzandsiz nikohdan ajralishlar soni 10 ming 479 tani (46,6 foiz), 1 nafar farzand bilan ajralishlar soni 6616 tani (29,4 foiz), 2 va undan ortiq farzand bilan nikohdan ajralishlar soni 5374 tani (24 foiz) tashkil etgan.

Nikohdan ajrashganlarning o‘rtacha yoshi erkaklar uchun 37,1 yoshni, ayollar uchun 32,2 yoshni tashkil etgan. Nikohdan ajrashganlarning eng katta ulushi 35 yoshgacha bo‘lgan ayollarga to‘g‘ri kelib, jami nikohdan ajrashganlarning 64,1 foizini tashkil etgan.