9 Noyabr 2024, 17:01 •Oʻzbekiston

Buxoroda maktab o‘quvchisi o‘zgalar nomiga kredit olib, onlayn qimorga tikib yubordi

Shofirkon tumanida 16 yoshli o‘smir o‘ndan ortiq shaxslar nomiga onlayn kredit olib, qimorga tikib yubordi.

Buxoro viloyati Shofirkon tumanida 16 yoshli o‘smir o‘ndan ortiq shaxslar nomiga onlayn kredit rasmiylashtirib olgani aniqlandi. Bu haqda “Bu kun” dasturida xabar berildi.

Ma’lum qilinishicha, 2024 yilning 24 may kuni Shofirkon tumani IIBga tumanning Iskogare mahallasida yashovchi fuqaro murojaat qilib, nomiga 54 mln so‘m kredit olinganini, hozirda mazkur kredit to‘lovlari uning plastik kartasidan yechib olinayotganligini bildirgan. Holat yuzasidan noma’lum shaxsga nisbatan Jinoyat kodeksining 168-moddasi 2-qismi bilan jinoyat ishi qo‘zg‘atilgan hamda Buxoro viloyati IIB Tezkor qidiruv xizmati Kiberxavfsizlik bo‘limi xodimlari tomonidan tezkor texnik va surishtiruv harakatlari olib borilgan.

Tezkor tadbirlar natijasida ushbu jinoyatni 2008 yilda Shofirkon tumanida tug‘ilgan o‘smir sodir qilganligi fosh etilgan.

O‘smir PayNet shoxobchasida norasmiy tarzda ishlagan va fuqarolarga sim-karta berish jarayonida ularning fotosuratlarini identifikatsiyadan o‘tkazish uchun olgan. So‘ngra yashirin ravishda fuqarolarning telefon raqami va fotosuratlaridan foydalanib, ularning nomiga onlayn kredit rasmiylashtirib olgan. U o‘ndan ortiq fuqaroga ko‘p miqdorda moddiy zarar yetkazgan. Qo‘lga kiritgan pullarini esa onlayn qimorga tikib yuborgan.

Pul yo‘qligi sababli mijozlarim nomiga “Anorbank” ilovasi orqali kredit rasmiylashtirdim. Har bir mijozimga 15-20 mln so‘mdan jami 100 mln so‘m miqdorida kredit oldim, degan bola.

Buxoro viloyati IIB axborot xizmati rahbari Shuhrat Jalolovga ko‘ra, voyaga yetmagan shaxsga nisbatan Jinoyat kodeksining 168-moddasi 3-qismi bilan jinoyat ishi qo‘zg‘atilgan hamda unga nisbatan qamoqqa ehtiyot chorasi qo‘llangan. Hozirgi kunda gumon qilinuvchidan boshqa jabrlangan shaxslar ham bo‘lishi mumkin degan ehtimol bilan tezkor surishtiruv harakatlari olib borilmoqda.