Talabalar ijara pulining bir qismini onlayn tarzda qaytarib olishi mumkin bo‘ladi

O‘zbekistonda oliy ta’lim muassasalari talabalari oylik ijara to‘lovining bir qismini qaytarish uchun onlayn ariza topshirishlari mumkin bo‘ladi, deb xabar beradi my.gov.uz portali.

Ma’lumotlarga ko‘ra, talabalar Yagona portal orqali ariza topshirishlari mumkin bo‘ladi, ilgari bu xizmatdan foydalanish uchun ariza beruvchilar dekan o‘rinbosariga, o‘zlari tahsil olayotgan fakultetning yoshlar bilan ishlash bo‘limiga yoki talabalarni turar joy bilan ta’minlash ishlarini muvofiqlashtiruvchi OTM bo‘limiga murojaat qilishlari kerak edi. Yangilik 2025-yil 1-noyabrdan kuchga kiradi.

Bundan tashqari, 2026-yil 1-yanvardan boshlab mamlakatda o‘rta maxsus, professional va oliy ta’lim muassasalarida ta’lim jarayoni bilan bog‘liq davlat xizmatlari Yagona portal orqali ham ko‘rsatiladi.

Avvalroq O‘zbekistonda magistraturaga qabul uchun qo‘shimcha qabul ochilgani haqida xabar berilgandi. Talabalar uchun kontrakt miqdorini OTMlar zarur xarajatlardan kelib chiqqan holda o‘zlari belgilaydi.