Ukrainadagi issiqxonalarda qullikda saqlangan 19 nafar fuqaro O‘zbekistonga qaytarildi
Vatandoshlarga “jabrlanuvchi” maqomi berildi, bu ularga nisbatan Ukraina qonunchiligi bo‘yicha sanksiyalar qo‘llanilishini istisno qildi.
Ukrainadan issiqxonalarda qullikda saqlangan 19 nafar fuqaro O‘zbekistonga qaytarildi, deb xabar bermoqda “Dunyo”.
O‘zbekiston elchixonasi qisqa vaqt ichida fuqarolarning huquq va manfaatlarini himoya qilish, ularning qonuniy huquqlarini tiklash, Ukrainadan xavfsiz chiqib ketish uchun hujjatlar va tashkiliy masalalarni hal qilish bo‘yicha keng ko‘lamli chora-tadbirlarni tashkil etdi.
Muzokaralar natijasida barcha 19 nafar fuqaroga “jabrlanuvchi” maqomi rasman berildi, bu esa ularga nisbatan Ukraina qonunchiligi bo‘yicha har qanday sanksiyalar qo‘llanilishini butunlay istisno qildi. XMTning Ukraina va Moldovadagi vakolatxonalarining bevosita mablag‘lari hisobidan 28-oktyabr kuni O‘zbekiston fuqarolari Kiyevdan Kishinyovga avtotransportda yetib kelishdi.
Moldova poytaxtida bo‘lish davrida xavfsiz yashash sharoitlari, oziq-ovqat va zarur yordam ta’minlandi. 2 noyabr kuni barcha 19 nafar vatandoshimiz XMT mutasaddilari hamrohligida Kishinyov–Istanbul–Urganch avia yo‘nalishi bo‘yicha jo‘nab ketishdi va 3 noyabr kuni O‘zbekistonga eson-omon yetib kelishdi.
Qullik sharoitida bo‘lgan vatandoshlar haqidagi ma’lumotlar 18-sentyabr kuni Ukraina ommaviy axborot vositalarida paydo bo‘ldi. Vaziyat darhol qat’iy diplomatik nazorat ostiga olindi. Keyinroq O‘zbekistonning Ukrainadagi elchixonasi Kiyev viloyatida o‘zbekistonliklarni qullikda ushlab turish voqeasiga izoh berdi.
Diplomatik vakolatxonaning ma’lum qilishicha, vatandoshlar tirik va qoniqarli holatda. Ular zarur tibbiy muolajalarni olish uchun Kiyev viloyatidagi mahalliy shifoxonalardan biriga yetkazilgan.
Izohlar