Yevropa Ittifoqining qishloq xo‘jaligi bo‘yicha komissari O‘zbekistonga keladi

Yevropa Ittifoqining qishloq xo‘jaligi bo‘yicha komissari Yanush Voytsexovskiy 5-6-sentyabr kunlari O‘zbekistonga tashrif buyuradi.

Yevropa Ittifoqining qishloq xo‘jaligi bo‘yicha komissari Yanush Voytsexovskiy 5-6-sentyabr kunlari O‘zbekistonga tashrif buyuradi. Bu haqda Yevropa Ittifoqining Toshkentdagi delegatsiyasiga tayanib, “Gazeta.uz” xabar berdi.

Tashrif YIning O‘zbekiston bilan davom etayotgan hamkorligidagi muhim qadam bo‘lib, iqlim o‘zgarishi, oziq-ovqat xavfsizligi kabi global muammolarni hal qilish hamda barqaror rivojlanish maqsadlariga erishish bo‘yicha umumiy majburiyatni bildiradi, deya ta’kidladi diplomatik missiya.

Yanush Voytsexovskiy “Dengizga chiqish imkoni bo‘lmagan rivojlanayotgan mamlakatlar: oziq-ovqat xavfsizligi va barqaror rivojlanish maqsadlari” xalqaro forumining ochilishida so‘zga chiqadi.

U o‘z nutqida YIning barqaror qishloq xo‘jaligi amaliyotini qo‘llab-quvvatlash va oziq-ovqat xavfsizligini ta’minlash, ayniqsa, dengizga chiqish imkoni bo‘lmagan rivojlanayotgan mamlakatlarda olib borilayotgan sa’y-harakatlarini alohida ta’kidlaydi.

Komissar hukumat vakillari, jumladan, Qishloq xo‘jaligi vaziri Ibrohim Abdurahmonov bilan ham uchrashuvlar o‘tkazadi. Ularda qishloq xo‘jaligi kooperatsiyasini kengaytirish, savdo istiqbollari va barqaror qishloq xo‘jaligini rivojlantirish bo‘yicha qo‘shma tashabbuslarni muhokama qilish rejalashtirilgan.

NOVA24 Instagramʼda. Obuna boʻling
Asosiy yangiliklar va qiziqarli videolar