Dzyudochi Diyora Keldiyorova Olimpiada chempioni bo‘ldi

U terma jamoaga ilk medalni taqdim etish bilan birga yozgi olimpiada o‘yinlari tarixida sovrindor bo‘lgan birinchi o‘zbekistonlik ayol sportchi bo‘ldi.

28-iyul kuni O‘zbekiston terma jamoasi Parij olimpiadasida ilk oltin medalni qo‘lga kiritdi. Unga dzyudo bahslarida -52 kg vazn toifasida finalgacha yetib kelgan Diyora Keldiyorova mualliflik qildi. U birinchilik uchun bahsda Tokio-2020 o‘yinlarida -48 kg vazn toifasida oltin medal egasi kosovolik Distriya Krasnikaga qarshi tatamiga chiqdi.

Uchrashuvning ikkinchi daqiqasida Keldiyorovaning vazari hisobiga olgan 1 ochkosi bahsga yakun yasadi. Shuning bilan o‘zbekistonlik Diyora Parij olimpiadasida dzyudo bellashuvlarining -52 kg vazn toifasidagi chempioniga aylandi. Bundan tashqari, u dzyudo bo‘yicha Olimpiada musobaqalarida O‘zbekiston tarixidagi ilk sovrindor ayol sportchi bo‘ldi.

Keldiyorova yarim finalda mezbon sportchi fransiyalik Amandin Byushardni mag‘lub etgandi. Chorak finalda esa yaponiyalik Uta Abeni yengib, raqibini turnirdan chiqarib yubordi.

-52 kg vazn toifasidagi sovrindorlar:

• 1-o‘rin: Diyora Keldiyorova (O‘zbekiston)
• 2-o‘rin: Distria Krasnika (Kosovo)
• 3-o‘rin: Amandin Byushard (Fransiya)

NOVA24 YouTubeʼda. Obuna boʻling
Asosiy yangiliklar va qiziqarli videolar