Toshkentda qurilganiga uch kun boʻlgan avtobus bekati qulab tushdi

Hodisaga uning ustunlari yaxshi mustahkamlanmagani sabab boʻlgan.

Toshkent shahri Yashnobod tumanida joylashgan “Gʻalabaning 40 yilligi” bekati qulab tushdi. “Toshshahartransxizmat” AJ matbuot xizmati holat yuzasidan maʼlumot berdi.

Qayd etilishicha, ushbu bekat tuman hokimligi tomonidan 15-iyul kuni qurilgan. Hodisaga uning ustunlari yaxshi mustahkamlanmagani sabab boʻlgan.

Holat oqibatida hech bir fuqaro va yoʻlovchiga zarar yetmagan boʻlib, hozirda masʼul xodimlar tomonidan bekatni qayta qurish ishlari olib borilmoqda, deyiladi xabarda.

Shuningdek, fuqarolardan xavfsizlik choralarini koʻrgan holda maxsus avtobus yoʻlaklarida jamoat transportini kutishlari soʻraldi.

Maʼlumot uchun, 2- va 5-avtobus saroyi tasarrufida boʻlgan mazkur bekatda 11 dan ortiq avtobus yoʻnalishi harakatlanadi.

NOVA24 Instagramʼda. Obuna boʻling
Asosiy yangiliklar va qiziqarli videolar