Turkiyadagi mehmonxonada zo‘rlik bilan ushlab turilgan O‘zbekiston fuqarosi vatanga qaytarildi

Turkiyaning Mugla viloyatida odam savdosi qurboniga aylangan o‘zbekistonlikka yordam ko‘rsatildi.

Turkiyada odam savdosi qurboniga aylangan o‘zbekistonlik mamlakat Bosh konsulxonasi sa’y-harakatlari bilan O‘zbekistonga qaytarildi.

Konsulxona ma’lumotiga ko‘ra, O‘zbekiston fuqarosi H.F. o‘z arizasida yaqin qarindoshi M.A. uni Turkiyaning Mugla viloyatidagi The Pera Hotel Marmaris mehmonxonasida zo‘rlik bilan ushlab turganini ma’lum qilgan.

Bosh konsulxona va Turkiyaning tegishli huquqni muhofaza qilish organlari tomonidan olib borilgan o‘rganishlar natijasida holat murojaatchi aytganidek bo‘lib chiqdi. Amalga oshirilgan tadbirlar natijasida H.F ozod etildi va Istanbulga olib kelinib, xavfsiz joyga joylashtirildi.

Mahalliy huquq-tartibot idoralari tomonidan mazkur holatga aloqador bo‘lgan va Turkiyada odam savdosi bilan shug‘ullanuvchi uyushgan jinoiy guruh a’zolari qo‘lga olindi. Hozirda mazkur holat yuzasidan tergov harakatlari olib borilmoqda.

Vatandosh H.F esa shu yil 15 noyabr kuni O‘zbekistonga qaytarildi.

NOVA24 Instagramʼda. Obuna boʻling
Asosiy yangiliklar va qiziqarli videolar