O‘zbekistonda yosh ekofaol fuqarolarning “yashil” g‘oyalari moliyalashtiriladi
Buning uchun maxsus jamg‘arma paydo bo‘ladi.
O‘zbekistonda yosh ekofaol fuqarolarga “yashil” g‘oyalarni amalga oshirish uchun pul ajratiladi, deb xabar bermoqda Yoshlar ishlari agentligi matbuot xizmati.
Ma’lumotlarga ko‘ra, 2026-yildan boshlab hokimiyat atrof-muhitni muhofaza qilish va ekologik madaniyatni oshirishga qaratilgan “yashil” g‘oyalarni amalga oshirish uchun har yili 10 milliard so‘mgacha mablag‘ ajratishni rejalashtirmoqda. Rejalarni amalga oshirish uchun Yoshlar ishlari agentligi huzurida “Yashil tashabbuslarni qo‘llab-quvvatlash jamg‘armasi” tashkil etiladi.
Jamg‘arma tabiatga muhabbat va ekologik madaniyatni rivojlantirishga hissa qo‘shadigan, shuningdek, chiqindilarni qayta ishlash, yashil energiya va ekologik toza texnologiyalarni rivojlantiradigan loyihalarni moliyalashtiradi. Shuningdek, daraxt ekish va parvarishlash bo‘yicha tashabbuslarni, yoshlarning iqlim o‘zgarishi va ekologik barqarorlik bo‘yicha g‘oyalarini qo‘llab-quvvatlash rejalashtirilgan. Bundan tashqari, moliyalashtiriladigan loyihalar qatoriga quyidagilar kiradi:
- ekologiya mavzusida video, animatsiya va media loyihalar yaratish;
- energiya samaradorligi bo‘yicha tanlovlar va aksiyalar tashkil etish;
- o‘rmonlarni tiklash, ekoturizmni rivojlantirish bo‘yicha tashabbuslar;
- eko-chellenjlarni o‘tkazish va energiya sarfini kamaytiradigan mobil ilovalarni yaratish.
Avvalroq O‘zbekistonda ekologik huquqbuzarliklar uchun jarimalar oshirilishi xabar qilingandi. Yangilangan ro‘yxat Toshkent shahar ekologiya boshqarmasi tomonidan e’lon qilindi.
Izohlar